ભરૂચ નજીકના દિલ્હી–મુંબઈ એક્સપ્રેસવે પર ફરી એકવાર ચિંતાજનક ઘટના સામે આવી છે. સોશિયલ મીડિયામાં વાયરલ થયેલા વિડિયોમાં પ્રતિબંધ હોવા છતાં ચાર સવારી સાથે બાઈક હાઈ-સ્પીડ કોરિડોર પર દોડતી જોવા મળે છે. બાઈક પર એક બાળક અને બે મહિલાઓ સાથે ચાલક નિર્ભયતાથી આગળ વધી રહ્યો છે.આ એક્સપ્રેસવે પર ભારે વાહનો 100થી 120 કિલોમીટર પ્રતિ કલાકની ઝડપે દોડે છે. આવી ઝડપ વચ્ચે ચાર લોકો સાથે બાઈક ચલાવવી માત્ર ટ્રાફિક નિયમોનું ઉલ્લંઘન નથી, પરંતુ જીવને સીધું જોખમમાં મૂકવાની ઘટના છે. એક નાની ચૂક પણ ભયાનક દુર્ઘટનામાં ફેરવાઈ શકે છે.
હવે સવાલ એ છે કે પ્રતિબંધ હોવા છતાં બાઈક અંદર પ્રવેશ્યું કેવી રીતે? શું ક્યાંક ગેરકાયદેસર પ્રવેશ બિંદુ ખુલ્લું છે? શું બેરિકેડિંગમાં ખામી છે? કે પછી પેટ્રોલિંગ અને દેખરેખ વ્યવસ્થામાં ઢીલાશ છે?આ માર્ગનું સંચાલન કરતી નેશનલ હાઈવે ઓથોરિટી ઓફ ઈન્ડિયા માટે આ ઘટના ગંભીર ચેતવણી સમાન છે. જો ગેરકાયદેસર પ્રવેશ સહેલાઈથી શક્ય બને, તો સુરક્ષા વ્યવસ્થાની અસરકારકતા પર સવાલ ઊભા થવું સ્વાભાવિક છે.
સ્થાનિકોમાં માંગ ઉઠી રહી છે કે ગેરકાયદેસર પ્રવેશના તમામ રસ્તાઓ તાત્કાલિક બંધ કરવામાં આવે, સતત પેટ્રોલિંગ વધારવામાં આવે અને નિયમ ભંગ કરનારાઓ સામે કડક કાર્યવાહી કરવામાં આવે. નહીં તો કોઈ મોટી દુર્ઘટના માત્ર સમયની બાબત બની શકે છે.હવે જોવાનું રહ્યું કે તંત્ર સમયસર પગલાં લે છે કે પછી કોઈ અનિચ્છનીય ઘટના પછી જ કડકાઈ દેખાડશે.
Author: Yasin Diwan
સમાચાર તેમજ જાહેરાત આપવા માટે સંપર્ક કરો : 9574469023