વાગરા-દહેજ માર્ગ પર ભ્રષ્ટાચારની પોલ ખૂલી, મીડિયા અહેવાલ બાદ તંત્ર જાગ્યું, અધૂરા સમારકામથી સવાલો યથાવત્, ગુણવત્તાના નામે મસમોટો ભ્રષ્ટાચાર, જવાબદારી કોની?

વાગરા-દહેજ રોડ પર તંત્રની બેદરકારી, જીવલેણ ખાડા અને ભ્રષ્ટ નિર્માણ, વાગરા-દહેજ માર્ગ પર પ્રજા પરેશાન:- વાગરા-દહેજ માર્ગ પર પીસાદ ગામ નજીક પડેલ એક વિશાળ અને અત્યંત ભયજનક ખાડાએ સ્થાનિક તંત્રની નિષ્ક્રિયતા અને રોડ નિર્માણમાં થયેલા ભ્રષ્ટાચારની પોલ ખોલી નાખી હતી. તાજેતરમાં જ કરોડો રૂપિયાના ખર્ચે નવીનીકરણ પામેલો આ માર્ગ માત્ર બે વર્ષના ટૂંકાગાળામાં જ ખખડધજ બની ગયો હતો, જેના પર પડેલા મસમોટા ખાડાઓ વાહનચાલકો માટે જીવલેણ સાબિત થઈ રહ્યા હતા. GEO GUJARAT NEWS માં આ અંગેના સચોટ અહેવાલ પ્રસિદ્ધ થયા બાદ આખરે તંત્ર સફાળું જાગ્યું હતું. અને ભયજનક ખાડાનું સમારકામ હાથ ધરવામાં આવ્યું, પરંતુ આ ‘દેખાડા’ પૂરતા સમારકામથી રોડની ગુણવત્તા અને ભ્રષ્ટાચાર અંગેના ગંભીર સવાલો યથાવત્ રહ્યા છે.
જીવલેણ ખાડો અને તંત્રની બેદરકારી :- વાગરા-દહેજ માર્ગ પર પીસાદ ગામ નજીક આવેલા સ્મશાન પાસેનો આ ખાડો વાહનચાલકો માટે સતત જોખમ ઊભું કરી રહ્યો હતો. નવીનીકરણ બાદ પણ રોડની આવી દયનીય હાલત અને તેના પર પડેલો આ ખાડો કોઈ મોટી દુર્ઘટનાને નોતરી શકે તેવી દહેશત હતી. સ્થાનિક લોકો અને વાહનચાલકો દ્વારા વારંવાર રજૂઆતો કરવા છતાં તંત્ર દ્વારા કોઈ નક્કર કાર્યવાહી કરવામાં આવી ન હતી. પરિણામે, અનેક વાહનો આ ખાડામાં પટકાઈને ક્ષતિગ્રસ્ત થયા હતા, જેના કારણે વાહનચાલકોને મોટા આર્થિક નુકસાનનો સામનો કરવો પડ્યો હતો. સૌથી ગંભીર બાબત એ હતી કે, અજાણ્યા ટુ-વ્હીલર ચાલકો પણ અંધારામાં કે ઝડપમાં આ ખાડાને પારખી ન શકતા રોડ પર પટકાઈને ઈજાગ્રસ્ત થયા હતા, જે સ્પષ્ટપણે તંત્રની ઘોર બેદરકારી સૂચવે છે.મીડિયાની સક્રિયતા અને તંત્રની ‘જાગૃતિ’ :- GEO GUJARAT NEWS માં આ જીવલેણ ખાડા અને રોડની બદતર હાલત અંગે વિસ્તૃત અહેવાલ પ્રસિદ્ધ કરવામાં આવ્યા હતા. આ અહેવાલોમાં તસવીરો સાથે રોડની ખરાબ ગુણવત્તા અને તેનાથી થતા અકસ્માતોની વિગતો છતી કરવામાં આવી હતી. મીડિયાના સતત દબાણ અને લોકરોષને પગલે આખરે સ્થાનિક તંત્ર સફાળું જાગ્યું અને તાત્કાલિક ધોરણે પીસાદ ગામ નજીક પડેલા ભયજનક ખાડાનું પુરાણ કાર્ય હાથ ધરવામાં આવ્યું. તંત્રની આ ‘જાગૃતિ’ દર્શાવે છે કે, જ્યાં સુધી મીડિયા દ્વારા દબાણ ન આવે ત્યાં સુધી પ્રજાના પૈસા વેડફીને બનેલા અધૂરા અને ખરાબ ગુણવત્તાવાળા કામો પર કોઈ ધ્યાન આપવામાં આવતું નથી.કરોડોના ખર્ચે બનેલા રોડ પર ભ્રષ્ટાચારના સવાલો :- સૌથી ચોંકાવનારી બાબત એ છે કે, આ માર્ગનું નિર્માણ કાર્ય માત્ર બે વર્ષ પૂર્વે જ થયું હતું. કરોડો રૂપિયાના ખર્ચે બનેલો આ રોડ આટલા ટૂંકાગાળામાં જ ઠેર ઠેર ખખડધજ બની ગયો અને તેના પર મોટા ખાડા પડી ગયા, તે રોડના નિર્માણ કાર્યમાં થયેલી ગુણવત્તા સામે ગંભીર સવાલો ઉભા કરે છે. સ્પષ્ટપણે, આ રોડની કામગીરીમાં મોટા પાયે ભ્રષ્ટાચાર થયો હોવાની આશંકાને નકારી શકાય તેમ નથી. પ્રજાના પરસેવાની કમાણીના કરોડો રૂપિયા આવા હલકી ગુણવત્તાના કામો પાછળ વેડફાઈ રહ્યા છે, જ્યારે જવાબદાર અધિકારીઓ અને કોન્ટ્રાક્ટરો સામે કોઈ કાર્યવાહી કરવામાં આવતી નથી.આંશિક રાહત અને ભવિષ્યના પડકારો :- જોકે, હવે માર્ગ પર પડેલા ખાડાઓનું પુરાણ કાર્ય શરૂ થતા વાહનચાલકોને થોડા અંશે રાહત થશે. પરંતુ આ સમારકામ કેટલો સમય ટકશે અને રોડની અન્ય ખરાબ થયેલી જગ્યાઓનું સમારકામ ક્યારે થશે તે મોટો પ્રશ્ન છે. શું તંત્ર માત્ર મીડિયાના અહેવાલ બાદ ‘આંખમાં ધૂળ નાખવા’ પૂરતું જ કામ કરશે કે પછી સમગ્ર રોડનું ગુણવત્તાયુક્ત સમારકામ કરીને ભવિષ્યમાં આવા બનાવો ન બને તેની ખાતરી આપશે? વાગરા-દહેજ માર્ગની આ વર્તમાન સ્થિતિ ભ્રષ્ટાચાર સામે કડક પગલાં લેવાની અને નિર્માણ કાર્યોની ગુણવત્તાની કડક તપાસ કરવાની તાતી જરૂરિયાત દર્શાવે છે. આ સમગ્ર મામલે તંત્ર દ્વારા ભ્રષ્ટાચાર આચરનારાઓ સામે ક્યારે કાર્યવાહી કરવામાં આવશે અને શું ભવિષ્યમાં આવા હલકી ગુણવત્તાના કામો અટકાવવા માટે કોઈ નક્કર નીતિ બનાવવામાં આવશે, તે જોવું રહ્યું
.