વાગરા: વિલાયત-દેરોલ માર્ગ પર ટ્રાફિકનો નરક, ‘માત્ર પાંચ મિનિટનો રસ્તો કલાકોમાં કપાય છે!, ‘બેદરકારી અને ભ્રષ્ટાચારનો જીવતો જાગતો પુરાવો!

ટ્રાફિકજામનો ત્રાસ, રોષે ભરાયેલી પ્રજા, તંત્ર સામે સવાલ : ભરૂચ જિલ્લાના વિલાયત-દેરોલ માર્ગ પર સર્જાયેલી ટ્રાફિકની ભયંકર સમસ્યા હવે માત્ર અગવડતા નહીં પણ તંત્રની નિષ્ફળતા અને બેદરકારીનો જીવતો જાગતો પુરાવો બની ગઈ છે. ‘માત્ર પાંચ મિનિટનો રસ્તો’ કાપવા માટે કલાકો સુધી અટવાઈ રહેતા નોકરીયાત વર્ગ અને વાહનચાલકોનો રોષ હવે ચરમસીમાએ પહોંચ્યો છે. સવાલ એ છે કે, આ સમસ્યા માટે જવાબદાર કોણ?

માર્ગની અધૂરી કામગીરી છોડનાર કોન્ટ્રાકટર સામે તંત્રની લાપરવાહી! : આ માર્ગ પર એક તરફનો રસ્તો ખોદી નાખીને તેને બરબાદ કરી દેવાયો છે. વન-વે બનેલા આ રસ્તા પર મોટા ખાડાઓનું સામ્રાજ્ય છે. જે રોજબરોજ ટ્રાફિકજામનું મુખ્ય કારણ બને છે. સવાર-સાંજના સમયે GIDCમાં આવતા-જતા હજારો વાહનો અને તેમાંય ખાસ કરીને નોકરીયાત વર્ગના લોકો કલાકો સુધી રસ્તા પર અટવાઈ રહે છે, તેમનો કિંમતી સમય અને મહેનત વ્યર્થ જાય છે.

ચોમાસા પહેલા જ રોડ ખોદીને કામ અધૂરું છોડવાનો ભ્રષ્ટ કારસો! : આ માર્ગની હાલત માટે કોન્ટ્રાક્ટર અને તંત્રની મિલીભગત જવાબદાર હોવાનું સ્પષ્ટપણે દેખાઈ રહ્યું છે. ચોમાસા પહેલા જ કોન્ટ્રાક્ટરને ખબર હતી કે, આ માર્ગનું કામ સમયસર પૂર્ણ નહીં થાય છતાં તેણે બેફિકરાઈપૂર્વક એક તરફનો આખો રસ્તો ખોદી નાખ્યો અને કામ અધૂરું છોડી દીધું છે. આ પ્રકારની બેદરકારી માત્ર અજ્ઞાનતા નથી પરંતુ સીધો ભ્રષ્ટાચાર અને લોકોની મુશ્કેલીઓ પ્રત્યેની ઉપેક્ષા દર્શાવે છે. આ આડેધડ કામગીરીને કારણે જ આજે હજારો લોકો રોજ હાલાકી ભોગવી રહ્યા છે.

માર્ગની આ પરિસ્થિતિ માટે જવાબદાર કોણ? જનતા પૂછી રહી છે સવાલ! : આખરે આ સમસ્યાનું સમાધાન ક્યારે આવશે? જનતા સીધા સવાલો પૂછી રહી છે. શું આ રોડનું કામ અધૂરું છોડી દેનાર લાપરવાહ કોન્ટ્રાક્ટર સામે કોઈ કડક કાર્યવાહી થશે? શું આળસુ અને બેજવાબદાર તંત્ર સામે કોઈ કાયદેસર પગલાં ભરવામાં આવશે? આ સમસ્યા માત્ર ટ્રાફિકની નથી. પરંતુ તંત્રની નિષ્ફળતા અને લોકો પ્રત્યેની ઉપેક્ષાનો પુરાવો છે. જો તાત્કાલિક ધોરણે આ માર્ગનું સમારકામ કરીને ટ્રાફિકજામની સમસ્યાનો કાયમી ઉકેલ નહીં આવે તો લોકોનો રોષ જ્વાળામુખીની જેમ ફાટી નીકળશે. અને તેની જવાબદારી સીધી રીતે તંત્રની રહેશે તેવું પંથકના નાગરિકો જણાવી રહ્યા છે.

વાહનચાલકોની વેદના, ‘અમારો ગુનો શું?’: તંત્ર સામે સવાલો : વાહનચાલકોની વેદના શબ્દોમાં વર્ણવી શકાય તેમ નથી. રોજ સવારે અને સાંજે કામ પર જવા-આવવા માટે ટ્રાફિકજામમાં અટવાવું એ તેમની નિયતિ બની ગઈ છે. એક વાહનચાલકે પોતાની વ્યથા ઠાલવતા જણાવ્યું કે, “અમને સમજ નથી પડતી કે અમારો ગુનો શું છે. અમે ટેક્સ ભરીએ છીએ, કાયદાનું પાલન કરીએ છીએ, તેમ છતાં અમારે રોજ આ પીડા ભોગવવી પડે છે? માત્ર પાંચ મિનિટનો રસ્તો કાપવામાં કલાકો વીતી જાય છે. જેના કારણે અમે સમયસર ઘરે પહોંચી શકતા નથી. આ સમસ્યાથી અમારું માનસિક સ્વાસ્થ્ય પણ જોખમાઈ રહ્યું છે. ત્યારે તાકીદે આ સમસ્યાનું સમાધાન લાવવામાં આવે તેવી વાહન ચાલકો માંગ કરી રહ્યા છે.

અતિબિસ્માર માર્ગને કારણે અકસ્માતોનું જોખમ વધ્યું, ક્યારે જાગશે તંત્ર? : આ માર્ગ પર ખાડાઓ અને ટ્રાફિકજામને કારણે અકસ્માતોનું જોખમ અનેકગણું વધી ગયું છે. વાહનચાલકોને સાંકડી લેનમાંથી પસાર થવા માટે ભારે મહેનત કરવી પડે છે, અને વરસાદના કારણે ખાડાઓ પાણીથી ભરાઈ જતાં તેનો અંદાજ આવતો નથી. પરિણામે નાના વાહનો સ્લીપ થઈ જવાની કે પલટી જવાની ઘટનાઓ બની રહી છે, જ્યારે ભારે વાહનો પણ અટવાઈ જાય છે. આ પરિસ્થિતિ માત્ર સમયનો બગાડ નથી. પરંતુ લોકોના જીવન માટે પણ ગંભીર ખતરો ઊભો કરે છે. શું તંત્ર કોઈ મોટી દુર્ઘટના બને તેની રાહ જોઈ રહ્યું છે? આ માર્ગ પર તાત્કાલિક સુરક્ષાના પગલાં ભરવા અનિવાર્ય છે.

વાહન ચાલકોને આર્થિક નુકસાન અને વ્યાપાર પર અસર : આ માર્ગ પરના સતત ટ્રાફિકજામ અને વાહનોની અવરજવરમાં વિલંબ માત્ર નોકરીયાત વર્ગ માટે જ નહીં પરંતુ સ્થાનિક ઉદ્યોગો અને વ્યાપાર માટે પણ મોટું નુકસાનકારક સાબિત થઈ રહ્યો છે. સમયસર કાચો માલ ફેક્ટરી સુધી પહોંચાડી શકાતો નથી. અને તૈયાર માલના પરિવહનમાં પણ મોડું થાય છે. જેના કારણે ઉત્પાદન અને સપ્લાય ચેન ખોરવાઈ જાય છે. આ પરિસ્થિતિને લીધે ઉદ્યોગોને કરોડોનું નુકસાન વેઠવું પડે છે. આ માર્ગની નબળી સ્થિતિને કારણે માલવાહક વાહનોના સંચાલન ખર્ચમાં પણ વધારો થયો છે. તંત્રની આ નિષ્ફળતા માત્ર રસ્તાની સમસ્યા નથી. પરંતુ તે ભરૂચના ઔદ્યોગિક અને આર્થિક વિકાસને સીધી રીતે અવરોધી રહી છે.

એસ.ટી. બસ પણ ફસાઈ હતી. મુસાફરોના જીવ જોખમમાં : આ માર્ગની દયનીય સ્થિતિનો તાજેતરનો દાખલો બે દિવસ પહેલા જોવા મળ્યો હતો. ભારે ટ્રાફિક અને ખાડાઓને કારણે એક એસ.ટી. બસ ખાડામાં ફસાઈ ગઈ હતી. જેને કારણે બસનો એક તરફનો ભાગ નમી પડતા મુસાફરોમાં નાસભાગ મચી જવા પામી હતી. બસના મુસાફરોને ભારે હાલાકીનો સામનો કરવો પડ્યો હતો. અને તેમને સમયસર ગંતવ્ય સ્થાને પહોંચવામાં પણ ભારે વિલંબ થયો હતો. આ ઘટના સ્પષ્ટપણે દર્શાવે છે કે આ સમસ્યા માત્ર ખાનગી વાહનો પૂરતી સીમિત નથી. પરંતુ જાહેર પરિવહનને પણ ગંભીર અસર કરી રહી છે.