વાગરામાં સેવા પખવાડિયું સફળ, સેફ્ટી, સ્વચ્છ પર્યાવરણ અને સ્માર્ટ મીટર જાગૃતિ રેલીનું આયોજન કરાયું.

વાગરા તાલુકામાં સેવા પખવાડિયાની ઉજવણીના ભાગરૂપે આજરોજ એક જાગૃતિ રેલીનું સફળતાપૂર્વક આયોજન કરવામાં આવ્યું હતું. આ રેલીમાં વીજળીની સલામતી, સ્વચ્છ પર્યાવરણ, રિન્યૂએબલ એનર્જી અને સ્માર્ટ મીટરના ઉપયોગ અંગે લોકોમાં જાગૃતિ ફેલાવવાનો સફળ પ્રયાસ કરવામાં આવ્યો હતો.અનેક વિભાગો અને શાળાનો સહયોગ : આ જાગૃતિ રેલીનું આયોજન DGVCL વાગરા સબડિવિઝન દ્વારા કરવામાં આવ્યું હતું, જેમાં DGVCL દહેજ/અટાલી સબડિવિઝન, GETCO વાગરા ટી.આર. વિભાગ અને સ્થાનિક જ્ઞાન સરિતા સ્કૂલ, વાગરાના વિદ્યાર્થીઓ અને સ્ટાફે ઉત્સાહભેર સહયોગ આપ્યો હતો. વિવિધ સરકારી એકમો અને શૈક્ષણિક સંસ્થાઓના સહયોગથી આ રેલીએ સામાજિક જવાબદારીનો ઉત્તમ દાખલો બેસાડ્યો હતો.મામલતદારની ઉપસ્થિતિથી કાર્યક્રમને ગૌરવ : રેલીનો પ્રારંભ DGVCL વાગરા સબડિવિઝન કચેરીથી થયો હતો. જાગૃતિના સંદેશાઓ સાથેની આ રેલી જી.ઇ.બી ચોકડી અને આરોગ્ય કેન્દ્ર ચોકડી જેવા મુખ્ય માર્ગો પરથી પસાર થઈને મામલતદાર કચેરી વાગરા ખાતે પૂર્ણ થઈ હતી. આ કાર્યક્રમને વાગરા તાલુકાના મામલતદાર મીનાબેન પટેલ તથા સ્ટાફની ઉપસ્થિતિથી વિશેષ ગૌરવ પ્રાપ્ત થયું હતું. મામલતદારએ ઉપસ્થિત વિદ્યાર્થીઓ અને સ્ટાફને સેફ્ટી અને પર્યાવરણ જાળવણીના મહત્વ અંગે માર્ગદર્શન આપ્યું હતું.કાર્યક્રમનો મુખ્ય સંદેશ, સુરક્ષા અને નવીનતા : રેલી દરમિયાન ચાર મુખ્ય મુદ્દાઓ પર ભાર મૂકવામાં આવ્યો હતો. જેમાં સર્વપ્રથમ સેફ્ટી અવેરનેસ પર ધ્યાન કેન્દ્રિત કરાયું હતું. જેમાં વીજળીના ઉપકરણોનો ઉપયોગ કરતી વખતે રાખવાની સાવચેતી અને સલામતીના નિયમો વિશે માહિતી અપાઈ હતી. આ ઉપરાંત આસપાસના વિસ્તારને સ્વચ્છ રાખવા અને પર્યાવરણની જાળવણીના મહત્વને સમજાવતા સ્વચ્છ પર્યાવરણનો સંદેશ આપવામાં આવ્યો હતો. ત્રીજો મહત્વનો મુદ્દો રિન્યૂએબલ એનર્જીનો હતો. જેમાં સૌર ઊર્જા જેવા પુનઃપ્રાપ્ય ઊર્જા સ્ત્રોતોના ઉપયોગની જાગૃતિ ફેલાવવામાં આવી હતી. અને અંતે વીજ વપરાશમાં પારદર્શિતા અને કાર્યક્ષમતા લાવતા સ્માર્ટ મીટર અવેરનેસ હેઠળ તેના લાભો વિશે લોકોને માહિતગાર કરવામાં આવ્યા હતા. આ સફળ રેલીએ સાબિત કર્યું કે, જનજાગૃતિ અભિયાન દ્વારા જનતા અને સરકારી વિભાગો સાથે મળીને સુરક્ષિત અને ટકાઉ ભવિષ્ય તરફ આગળ વધી શકે છે. DGVCL ના આ પ્રયાસને વાગરાની જનતા તરફથી સારો પ્રતિસાદ મળ્યો હતો.