વાગરામાં યુવા શક્તિનો AAP તરફ ઝુકાવ, જાગેશ્વરમાં 35 યુવાનો જોડાયા : વાગરા તાલુકાના રાજકારણમાં આમ આદમી પાર્ટીનો દબદબો વધતો જોવા મળી રહ્યો છે. કોંગ્રેસના ઉસ્માનભાઈ ઉમરજી પટેલના તાજેતરના જોડાણની અસર હવે ગામડાં સુધી પહોંચી છે. જેના ભાગરૂપે, જાગેશ્વર ગામેથી ૩૫ જેટલા નવ યુવાનોએ ઉત્સાહભેર કોંગ્રેસનો સાથ છોડી AAPનું ઝાડુ પકડ્યું હતું. આ યુવાનોનું સ્વાગત લોકસભા ઇન્ચાર્જ યાકુબ ગુરજી અને જીલ્લા પ્રમુખ પિયુષ પટેલ સહિતના અગ્રણીઓએ કર્યું હતું. આગામી સ્થાનિક સ્વરાજ્યની ચૂંટણીઓ પહેલાં યુવાનોનો આ જંગી પ્રવાહ સ્પષ્ટ સંકેત આપે છે કે વાગરામાં AAPની જમીન મજબૂત થઈ રહી છે.
વાગરામાં એક જ દિવસમાં ડબલ પક્ષપલટો : આગામી સ્થાનિક સ્વરાજ્યની ચૂંટણીઓ પહેલા ભરૂચ જિલ્લાના વાગરા તાલુકામાં રાજકીય ઉથલપાથલ ચરમસીમાએ પહોંચી છે. એક તરફ જ્યાં આમ આદમી પાર્ટી સતત કોંગ્રેસમાંથી નેતાઓને પોતાની તરફ ખેંચી રહી છે. ત્યાં બીજી તરફ AAPના નારાજ કાર્યકરોની ઘરવાપસીનો સિલસિલો પણ શરૂ થઈ ગયો છે. તાજેતરમાં વાગરા ખાતે કોંગ્રેસના ઉસ્માનભાઈ ઉમરજી પટેલ પોતાના સાથીઓ સાથે AAPમાં જોડાયા હતા. આ મોટા જોડાણના પડઘા હજુ શમ્યા નથી. ત્યાં AAPએ વધુ એક શક્તિ પ્રદર્શન કર્યું છે.
જાગેશ્વર ગામે AAPમાં ૩૫ નવ યુવાનોનું જોડાણ : ગઈકાલે સાંજે વાગરા તાલુકાના જાગેશ્વર ગામે ૩૫ જેટલા નવ યુવાનોએ ઉત્સાહ સાથે આમ આદમી પાર્ટીનો ખેસ ધારણ કર્યો હતો. આ યુવાનોનું સ્વાગત કરવા માટે AAPના અગ્રણી નેતાઓ હાજર રહ્યા હતા. જેમાં લોકસભા ઇન્ચાર્જ યાકુબ ગુરજી, જીલ્લા પ્રમુખ પિયુષ પટેલ, યુવા આગેવાન ચિરાગભાઈ, એડવોકેટ કમલેશભાઈ મઢીવાલા અને તાજેતરમાં જોડાયેલા ઉસ્માનભાઈ ઉમરજી પટેલનો સમાવેશ થાય છે. આ જોડાણ સૂચવે છે કે સ્થાનિક સ્તરે AAP યુવા વર્ગમાં પોતાનું વર્ચસ્વ વધારવા માટે આક્રમક રીતે પ્રયાસ કરી રહી છે.
AAPમાંથી ૫૦થી વધુ કાર્યકરોની કોંગ્રેસમાં ઘર વાપસી : જોકે વાગરાની રાજનીતિ એકતરફી નથી રહી. જે દિવસે સાંજે જાગેશ્વર ખાતે AAP દ્વારા ૩૫ યુવાનોનું સ્વાગત કરવામાં આવ્યું હતુ. તે જ દિવસની સવારમાં એક મોટી પક્ષપલટાની ઘટના નોંધાઈ હતી. AAPના અગ્રણી જાવીદ મુન્શીએ પોતાના ૫૦થી વધુ કાર્યકરો સાથે આમ આદમી પાર્ટીનો છેડો ફાડીને કોંગ્રેસમાં ઘર વાપસી કરી લીધી હતી. આ ગતિવિધિઓ દર્શાવે છે કે સ્થાનિક સ્વરાજ્યની ચૂંટણીઓ નજીક આવતાં બંને મુખ્ય વિરોધી પક્ષો વચ્ચે કાર્યકરો અને નેતાઓની લેવડ-દેવડ સતત ચાલુ છે. જેનાથી રાજકીય માહોલ ગરમાયો છે.
ટિકીટની લાલચ કે નારાજગી? રાજકીય ઉઠલપાથલનું મૂળ કારણ :રાજકીય પંડિતોનું માનવું છે કે, આ પ્રકારના પક્ષપલટા પાછળ મુખ્યત્વે બે કારણો જવાબદાર છે, ટિકીટ ન મળવાની નારાજગી અને બીજું ટિકીટ મળવાની લાલચ. જે નેતાઓ વર્તમાન પક્ષમાં ટિકીટથી વંચિત રહે છે. તેઓ અન્ય પક્ષમાં તક શોધે છે. તેવામાં આગામી ચૂંટણીઓમાં પોતાને યોગ્ય સ્થાન મળે તે આશાએ નેતાઓ સમયસર પક્ષ બદલી રહ્યા છે. વાગરા તાલુકામાં એક જ દિવસમાં આટલા મોટા પ્રમાણમાં થયેલું જોડાણ અને છૂટા પડવાની ઘટના સૂચવે છે કે, ચૂંટણી પહેલા જમીની સ્તરે પક્ષો પોતાનું વર્ચસ્વ જાળવી રાખવા માટે સઘન પ્રયાસો કરી રહ્યા છે. અને આ રાજકીય અસ્થિરતા આગામી દિવસોમાં પણ ચાલુ રહેવાની શક્યતા રહેલી છે.
કોંગ્રેસને વધુ એક ફટકો? વાગરામાં મોટા માળખાના પક્ષપલટાના AAPના સણસણતા સંકેત : વાગરા તાલુકામાં ચાલી રહેલી રાજકીય ઉથલપાથલ વચ્ચે આમ આદમી પાર્ટીએ કોંગ્રેસની મુશ્કેલી વધારતા એક મોટો દાવો કર્યો છે. તાજેતરમાં પક્ષમાં જોડાયેલા પૂર્વ કોંગ્રેસી આગેવાન ઉસ્માનભાઈ ઉમરજી પટેલ સહિત AAPના સ્થાનિક નેતાઓના સંકેત મુજબ ટૂંક સમયમાં જ કોંગ્રેસનું એક મોટું માળખું પક્ષનો હાથ છોડી આમ આદમી પાર્ટીનું ઝાડુ પકડવા જઈ રહ્યું છે. જાગેશ્વર ખાતે ૩૫ યુવાનોના જોડાણ અને થોડા દિવસો પહેલા ઉસ્માનભાઈની આગેવાની હેઠળ થયેલા મોટા પ્રવેશ બાદ AAPનો આ દાવો સૂચવે છે કે, સ્થાનિક સ્વરાજ્યની ચૂંટણીઓ પહેલાં કોંગ્રેસના આંતરિક વિખવાદો હજી શમ્યા નથી. અને આયોજનબદ્ધ રીતે વધુ કાર્યકરો અને આગેવાનો પક્ષ બદલવા તૈયાર છે. જે વાગરાની રાજનીતિમાં મોટો ભૂકંપ લાવી શકે છે.
Author: Naeem Diwan
Owner Of Geogujaratnews.com