વાગરા નજીક જાનૈયાઓથી ભરેલી લક્ઝરી બસ પલ્ટી, ખુશીની સફર ગમમાં ફેરવાઈ, મુસાફરોને ઈજાઓ, મોટી જાનહાની ટળી

વાગરાથી ભરૂચ તરફ જઈ રહેલી એક ખાનગી લક્ઝરી બસ ખાં તળાવ નજીક અકસ્માતગ્રસ્ત થતા ક્ષણોમાં ખુશીની માહોલ ગમમાં ફેરવાઈ ગયો હતો. વાગરાના મુખ્ય બજાર વિસ્તારમાં રહેતા ઝાકીર ખત્રીના ઘરેથી લગ્ન પ્રસંગે જઈ રહેલા જાનૈયાઓથી ભરેલી બસ અચાનક પલ્ટી જતાં મુસાફરોમાં અફરાતફરી મચી ગઈ હતી. અકસ્માતમાં અનેક મુસાફરોને નાની-મોટી ઇજાઓ થઈ છે. પરંતુ સદ્દભાગ્યે કોઈ જાનહાનીના સમાચાર સામે આવ્યા નથી. પ્રત્યક્ષદર્શીઓના જણાવ્યા અનુસાર વાગરાથી નીકળેલી ખાનગી લક્ઝરી બસ ખાન તળાવ પાસે પહોંચી ત્યારે ચાલકે અચાનક સ્ટિયરિંગ પરથી કાબૂ ગુમાવ્યો હતો. કાબૂ છૂટી જતાં બસ રોડની સાઈડમાં પાણી ભરેલા કાંસમાં ઉતરી ગઈ અને બે થી ત્રણ વાર પલ્ટી મારી હતી. પલ્ટી મારી રહેલી બસમાંથી જાનૈયાઓના ચીસો અને મદદ માટેના અવાજો ગુંજી ઉઠ્યા હતા. આસપાસના લોકો અને અન્ય વાહનચાલકોએ દોડી જઈ તાત્કાલિક મદદ શરૂ કરી હતી. અકસ્માતની જાણ થતાં જ વાગરા પોલીસ સ્ટાફ તાત્કાલિક ઘટના સ્થળે પહોંચી ગયો હતો. સાથે જ આસપાસના ગામના લોકો પણ મદદ માટે ઉમટી પડ્યા હતા. સ્થાનિકોએ કાચ તોડી બસમાં ફસાયેલા મુસાફરોને બહાર કાઢ્યા હતા. પોલીસ અને સ્થાનિકોની સંયુક્ત કામગીરીને કારણે ઇજાગ્રસ્તોને ઝડપથી બહાર કાઢી વાગરા પ્રાથમિક આરોગ્ય કેન્દ્ર ખાતે ખસેડવામાં આવ્યા હતા. કેટલાક મુસાફરોને નાની-મોટી ચોટો અને ખંજવાળ જેવી ઇજાઓ થઈ હતી. આ વેળાએ ઘટના સ્થળ નજીકથી પસાર થતાં ફાયર વિભાગના કર્મચારીઓએ પણ તાત્કાલિક બચાવ કામગીરી હાથ ધરી હતી. બસના કાચ તોડી મુસાફરોને બહાર કાઢવામાં તેમણે મહત્વપૂર્ણ ભૂમિકા ભજવી હતી. ઇજાગ્રસ્ત મુસાફરોએ જણાવ્યું હતું કે, જો ફાયર વિભાગના કર્મચારીઓ તુરંત મદદ માટે ન આવ્યા હોત તો નુકસાન વધુ ગંભીર બની શકતું.એક ઇજાગ્રસ્ત મુસાફરે જણાવ્યું હતું કે, બસ અચાનક ડાબી તરફ ઝૂકી ગઈ અને અમે કઈ સમજીએ એ પહેલા બસ ત્રણ વાર પલ્ટી મારી ગઈ. મોટા પ્રમાણમાં નુકસાનની શક્યતા વચ્ચે કોઈ જાનહાની ન થતાં મુસાફરો અને તેમના પરિવારજનોને રાહતનો શ્વાસ આવ્યો હતો. પોલીસે અકસ્માતને ગંભીરતાથી લઈને તપાસ શરૂ કરી છે. પ્રાથમિક તબક્કે એવું માનવામાં આવી રહ્યું છે કે ડ્રાઇવરનું ધ્યાન ભંગ થવાને કારણે સ્ટિયરિંગ પરથી કાબૂ છૂટી ગયો હતો. આ ઘટનામાં કુલ 30 જેટલા લોકો ઇજાગ્રસ્ત થયા હતા. જે પૈકી 2 લોકોની હાલત વધુ ગંભીર હોવાથી તેઓએ ભરૂચ રીફર કરવામાં આવ્યા હતા.