ભરૂચ,
ભરૂચ S.O.G. (સ્પેશિયલ ઓપરેશન્સ ગ્રુપ) ટીમે ચોક્કસ બાતમીના આધારે કાર્યવાહી કરીને, અંકલેશ્વરની પદ્માવતી સોસાયટી ખાતે આવેલા ‘ધનલક્ષ્મી કિરાણા સ્ટોર’માંથી ગેરકાયદેસર ગેસ રિફિલિંગનો પર્દાફાશ કર્યો છે.
પોલીસે દુકાનમાં ચેકિંગ કરતાં આરોપી શ્રવણકુમાર આસુરામ ખટીકને પકડી પાડ્યો હતો, જે કિરાણા સ્ટોરની આડમાં એક ગેસ બોટલમાંથી બીજી બોટલમાં અનઅધિકૃત અને ભયજનક રીતે જ્વલનશીલ પદાર્થ ટ્રાન્સફર કરતો હતો.
પોલીસે સ્થળ પરથી HP અને સુપરકિશન કંપનીની ભરેલી અને ખાલી બોટલો, રિફિલિંગ પાઈપ અને ઈલેક્ટ્રિક વજન કાંટા સહિત કુલ ₹12,700/-ની કિંમતનો મુદ્દામાલ જપ્ત કર્યો છે. આરોપીએ બેદરકારી દાખવી પોતાની તથા અન્ય લોકોની જિંદગી જોખમમાં મૂકે તેવું કૃત્ય કરવા બદલ અંકલેશ્વર GIDC પોલીસ સ્ટેશનમાં કાયદેસરની કાર્યવાહી હાથ ધરવામાં આવી છે.
