આમોદ શહેરમાં ઓનલાઈન ગેમિંગના વધતા પ્રભાવ અને સાયબર ફ્રોડના બનાવોને ધ્યાનમાં રાખીને આમોદ પોલીસ સ્ટેશનની SHE ટીમ દ્વારા જનજાગૃતિ અભિયાન હાથ ધરવામાં આવ્યું હતું. આ અભિયાનનો હેતુ ખાસ કરીને વિદ્યાર્થીઓ અને સામાન્ય નાગરિકોને સાયબર ગુનાઓથી બચવા માટે જરૂરી માહિતી અને માર્ગદર્શન પૂરું પાડવાનો હતો.
આ કાર્યક્રમ દરમિયાન મહિલા પોલીસ કર્મચારી તુલસીબેન અને હિરલબેને લોકો સાથે સીધી વાતચીત કરી ઓનલાઈન ગેમિંગના નુકસાનકારક પાસાઓ, સાયબર ઠગો દ્વારા અપનાવવામાં આવતી નવી રીતો તથા સોશિયલ મીડિયા પર થતી છેતરપિંડી અંગે સમજાવ્યું હતું. સરળ કમાણીની લાલચમાં આવીને યુવાનો કેવી રીતે આર્થિક અને માનસિક નુકસાન ભોગવી રહ્યા છે તે બાબતે વિશેષ જાગૃતિ લાવવામાં આવી હતી.જનજાગૃતિ દરમિયાન નાગરિકોને શંકાસ્પદ ફોનકૉલ, મેસેજ, લિંક કે એપ્લિકેશનથી સાવચેત રહેવા, કોઈપણ ઓનલાઈન લેવડદેવડ કરતા પહેલા તેની ખાતરી કરવા તેમજ સાયબર ગુનાની ઘટના બને તો તરત પોલીસ અથવા સાયબર હેલ્પલાઇનનો સંપર્ક કરવાની પ્રક્રિયા સમજાવવામાં આવી હતી. SHE ટીમે લોકોને અપીલ કરી હતી કે અજાણ્યા ગેમિંગ પ્લેટફોર્મ્સ અને લાલચભર્યા ઑફર્સથી દૂર રહેવું ખૂબ જરૂરી છે.
આ અભિયાનમાં શહેરના વિદ્યાર્થીઓ અને નાગરિકોએ ઉત્સાહપૂર્વક ભાગ લીધો હતો અને ડિજિટલ સુરક્ષા અંગે ઉપયોગી જાણકારી મેળવી હતી. સાયબર ગુનાઓની વધતી ઘટનાઓ વચ્ચે આમોદ પોલીસની આ પહેલને લોકો તરફથી સકારાત્મક પ્રતિસાદ મળ્યો હતો. આવા જાગૃતિ કાર્યક્રમો દ્વારા સમાજમાં સાયબર સલામતી અંગે સમજ વિકસાવવાનો પ્રયાસ આમોદ પોલીસ દ્વારા સતત કરવામાં આવી રહ્યો છે.
Author: Yasin Diwan
સમાચાર તેમજ જાહેરાત આપવા માટે સંપર્ક કરો : 9574469023