વાગરા: દહેજની ઔદ્યોગિક ધરા પર ભરૂચ પોલીસનો નવતર અભિગમ, યોકોહામા કંપનીમાં મહિલા કર્મીઓ સુરક્ષા કવચથી સજ્જ

ઔદ્યોગિક એકમોથી ધમધમતા ભરૂચ જિલ્લામાં મહિલાઓની સુરક્ષા અને આત્મવિશ્વાસને નવી ઊંચાઈ આપવા માટે જિલ્લા પોલીસ તંત્ર દ્વારા એક સરાહનીય ઝુંબેશ હાથ ધરવામાં આવી છે. ‘સશક્ત નારી, સુરક્ષિત સમાજ’ની નેમ સાથે દહેજ સ્થિત જાણીતી યોકોહામા કંપનીના પરિસરમાં તાજેતરમાં એક વિશેષ જાગૃતિ મહાઅભિયાનનું આયોજન કરવામાં આવ્યું હતું, જેમાં મોટી સંખ્યામાં મહિલા કર્મચારીઓએ ભાગ લીધો હતો. ભરૂચ જિલ્લા પોલીસ અધિક્ષક અક્ષયરાજ મકવાણાની દીર્ઘદ્રષ્ટિ અને સીધા માર્ગદર્શન હેઠળ યોજાયેલા આ કાર્યક્રમનો મુખ્ય ઉદ્દેશ્ય માત્ર કાયદાકીય જાણકારી આપવાનો જ નહીં, પરંતુ મહિલાઓમાં પોલીસ પ્રત્યેનો વિશ્વાસ કેળવવાનો પણ હતો. આ સેમિનાર થકી નોકરિયાત અને આત્મનિર્ભર મહિલાઓને રોજિંદા જીવનમાં સ્પર્શતા વિવિધ સુરક્ષાના પાસાઓથી વાકેફ કરવામાં આવ્યા હતા.માર્ગ સુરક્ષા અને શિસ્તના પાઠ: કાર્યક્રમના પ્રથમ ચરણમાં જિલ્લા ટ્રાફિક શાખાના પોલીસ ઇન્સ્પેક્ટર પી.ડી. ઝણકાટે ઉપસ્થિત બહેનોને માર્ગ સુરક્ષાના પાઠ ભણાવ્યા હતા. તેમણે વાહન ચલાવતી વખતે રાખવી પડતી સાવચેતી, હેલ્મેટ અને સીટબેલ્ટનું મહત્વ તથા ટ્રાફિક નિયમોનું પાલન એ માત્ર દંડથી બચવા માટે નહીં, પરંતુ પોતાના અને પરિવારના જીવનરક્ષણ માટે અનિવાર્ય હોવાનું ભારપૂર્વક જણાવ્યું હતું.નારી સુરક્ષા અને કાયદાકીય પીઠબળ: મહિલાઓને તેમના અધિકારો પ્રત્યે જાગૃત કરતા મહિલા પોલીસ સ્ટેશનના પી.એસ.આઈ. વૈશાલી આહીરે નારી સુરક્ષાને લગતા કાયદાઓની સરળ ભાષામાં સમજ આપી હતી. તેમણે ઘરેલુ હિંસા, કાર્યસ્થળ પર થતી સતામણી અને છેડતી જેવા બનાવો સામે કઈ રીતે અવાજ ઉઠાવવો તેની હિંમત પૂરી પાડી હતી. સાથે જ, મુશ્કેલીના સમયે પોલીસની મદદ તાત્કાલિક કેવી રીતે મેળવવી અને વિવિધ મહિલા હેલ્પલાઇન નંબરોની ઉપયોગિતા વિશે વિસ્તૃત ચર્ચા કરી હતી.ડિજિટલ યુગમાં સાયબર સુરક્ષા: વર્તમાન સમયના અદ્રશ્ય પડકાર સમાન સાયબર ક્રાઈમ અંગે જાગૃતિ ફેલાવતા સાયબર ક્રાઈમ બ્રાન્ચના હેડ કોન્સ્ટેબલ મલ્કેશ ગોહિલે ખૂબ જ મહત્વપૂર્ણ જાણકારી શેર કરી હતી. તેમણે સોશિયલ મીડિયા પર પ્રાઈવસી જાળવવા, અજાણી લિંક પર ક્લિક ન કરવા અને ઓનલાઈન આર્થિક વ્યવહારોમાં થતી છેતરપિંડી (ફિશિંગ)થી બચવા માટેની ડિજિટલ સેફ્ટી ટિપ્સ આપી હતી. ટેકનોલોજીનો ઉપયોગ વરદાન બની રહે અને અભિશાપ ન બને તે માટેની તકેદારીઓ તેમણે સમજાવી હતી. આ જ્ઞાનસત્રમાં યોકોહામા કંપનીની મહિલા કર્મચારીઓએ માત્ર શ્રોતા બનીને રહેવાને બદલે સક્રિયપણે ભાગ લીધો હતો અને પોતાની મૂંઝવણો અંગે પ્રશ્નો પૂછી તેનું નિરાકરણ મેળવ્યું હતું. ભરૂચ પોલીસની આ પ્રો-એક્ટિવ કામગીરીને પગલે મહિલાઓમાં સુરક્ષાની ભાવના વધુ પ્રબળ બની છે અને આ પહેલને ચોમેરથી આવકાર મળી રહ્યો છે.