વાગરા પોલીસ સ્ટેશન વિસ્તારમાં દારૂબંધીના કાયદાનું કડક પાલન કરાવવા માટે પોલીસ દ્વારા આક્રમક ઝુંબેશ શરૂ કરવામાં આવી છે. તારીખ ૨૦ અને ૨૧ ફેબ્રુઆરી ૨૦૨૬ના રોજ વાગરા પોલીસની અલગ-અલગ ટીમોએ વિલાયત, સલાદરા અને વાગરાના રહેણાંક વિસ્તારોમાં સપાટો બોલાવ્યો હતો. આ બે દિવસીય કાર્યવાહી દરમિયાન પોલીસે ગેરકાયદેસર દેશી દારૂના વેચાણ અને હેરાફેરી સામે કડક પગલાં ભરીને અનેક બુટલેગરોને ઝડપી પાડ્યા છે. પોલીસ સૂત્રો પાસેથી મળતી માહિતી મુજબ, આ ખાસ ડ્રાઈવ અંતર્ગત વિલાયત GIDC વિસ્તારમાં કુલ ૩ દરોડા પાડવામાં આવ્યા હતા. આ ઉપરાંત, સલાદરા ગામમાં ૨૧ ફેબ્રુઆરીના રોજ અલગ-અલગ સમયે ઓપરેશન હાથ ધરવામાં આવ્યું હતું. વાગરાના કોઠી ફળીયા તેમજ આસપાસના અન્ય વિસ્તારોમાંથી પણ ગેરકાયદેસર દારૂનો જથ્થો કબજે કરવામાં આવ્યો છે. પોલીસની આ વિવિધ કાર્યવાહીમાં કુલ ૭૩ લિટર દેશી દારૂનો જથ્થો મળી આવ્યો છે, જેની અંદાજિત કિંમત રૂપિયા ૧૪,૬૦૦ જેટલી થાય છે.
આ તમામ કિસ્સાઓમાં પોલીસે ગુના નોંધીને તમામ આરોપીઓ વિરુદ્ધ કાયદેસરની તપાસ હાથ ધરી છે. આ સફળ કામગીરીમાં હેડ કોન્સ્ટેબલ ભોપાભાઇ ગફુરભાઇ, સુરેશભાઈ ઈશ્વરભાઈ વાઘેલા અને તેમની ટીમે મહત્વની ભૂમિકા ભજવી હતી. પોલીસની આ આકરા તેવર જોઈને પંથકના બુટલેગરોમાં ફફડાટ વ્યાપી ગયો છે. પોલીસે સ્પષ્ટ સંકેત આપ્યા છે કે આગામી સમયમાં પણ ગેરકાયદેસર પ્રવૃત્તિઓ સામે આવી જ કડક કાર્યવાહી ચાલુ રહેશે.
Author: geogujaratnews
geogujarat2020@gmail.com www.geogujaratnews.com