ભરૂચમાં ગોપાલક સમાજનો પ્રેરણાદાયી મંગલ મહોત્સવ, ૧૬ નવયુગલોએ કરકસર અને સાદગીના શપથ સાથે ગૃહસ્થાશ્રમમાં પ્રવેશ કર્યો

ભરૂચના શૈક્ષણિક અને સામાજિક હૃદય સમાન દૂધધારા ડેરી મેદાન ખાતે તાજેતરમાં ભરૂચ જિલ્લા ગોપાલક મંડળ દ્વારા આયોજિત નવમા સમૂહ લગ્નોત્સવમાં સંસ્કાર અને સમરસતાનો ત્રિવેણી સંગમ જોવા મળ્યો હતો. સામાજિક કુરિવાજો અને લગ્ન પાછળ થતા અંધાધૂંધ ખર્ચને તિલાંજલિ આપવાના ઉમદા આશય સાથે આયોજિત આ સામૂહિક લગ્ન વિધિમાં ૧૬ યુગલોએ શાસ્ત્રોક્ત મંત્રોચ્ચાર અને મંગલફેરા સાથે જીવનના નવા અધ્યાયનો પ્રારંભ કર્યો હતો. આ ભગીરથ કાર્યને સફળ બનાવવા માટે સમાજના અગ્રણીઓ દિનેશ આહિર, લક્ષ્મણ આહિર અને બાબુ આહિરે જહેમત ઉઠાવી કાર્યક્રમનું સુંદર સંચાલન કર્યું હતું.આ માંગલિક પ્રસંગે આશીર્વાદ પાઠવવા માટે ધારાસભ્ય રમેશ મિસ્ત્રી, અરુણસિંહ રણા, પૂર્વ ધારાસભ્ય દુષ્યંત પટેલ સહિત આધ્યાત્મિક ચેતનાના પ્રતીક સોમદાસ બાપુ (સનાતન ધર્મ પરિવાર) અને સેવાભાવી અગ્રણી ધનજી પરમાર (માં મણીબા ચેરીટેબલ ટ્રસ્ટ) તથા બળદેવ આહિર વિશેષ રૂપે ઉપસ્થિત રહ્યા હતા. મહાનુભાવોએ નવદંપતીઓને સુખી અને સમૃદ્ધ દાંપત્ય જીવનની શુભેચ્છાઓ પાઠવતા જણાવ્યું હતું કે, આવા આયોજનોથી સમાજમાં આર્થિક બોજ હળવો થાય છે અને એકબીજા પ્રત્યે સહયોગની ભાવના સુદ્રઢ બને છે. વક્તાઓએ સમૂહ લગ્નને સમયની માંગ ગણાવી આધુનિક યુગમાં ‘મિતવ્યયિતા’ (કરકસર) અને સાદગીપૂર્ણ લગ્નોત્સવના આ મોડેલને બિરદાવ્યું હતું. મોટી સંખ્યામાં ઉમટી પડેલા સમાજજનોની સાક્ષીમાં સંપન્ન થયેલો આ મહોત્સવ સામાજિક એકતાનું જીવંત ઉદાહરણ પૂરું પાડવામાં સફળ રહ્યો હતો.