અંકલેશ્વરના ઉછાલી ગામની સીમમાં પર્યાવરણના જતન માટે તૈયાર કરવામાં આવેલું હરિયાળું વન અચાનક ભભૂકી ઉઠેલી આગમાં હોમાઈ ગયું છે. UPL કંપની દ્વારા સામાજિક જવાબદારીના ભાગરૂપે વિકસાવવામાં આવેલ ગ્રીન બેલ્ટમાં અગમ્ય કારણોસર ભીષણ આગ ફાટી નીકળતા વર્ષોની મહેનત બાદ ઉછરેલા ઘટાદાર વૃક્ષો અને કુમળા છોડવાઓ બળીને ખાખ થઈ ગયા છે. ઉછાલી ગ્રામ પંચાયત દ્વારા પર્યાવરણ સુરક્ષાના હેતુથી આ જમીન કંપનીને સોંપાઈ હતી, જે સમય જતાં એક ગાઢ વનરાજીમાં ફેરવાઈ હતી, પરંતુ આ અકસ્માતે પ્રકૃતિપ્રેમીઓમાં ભારે શોક વ્યાપ્યો છે.
આ ગ્રીન બેલ્ટ માત્ર વૃક્ષોનો સમૂહ નહોતો, પરંતુ પર્યાવરણલક્ષી પ્રવૃત્તિઓનું કેન્દ્ર પણ હતો, જ્યાં દર વર્ષે ઉત્સાહભેર વૃક્ષારોપણ થતું હતું. ઘટનાની ગંભીરતાને જોતા વન વિભાગ અને મામલતદાર કચેરી સહિતના તંત્રોને જાણ કરવામાં આવી છે. પ્રકૃતિ સુરક્ષા મંડળે આ નુકસાનને પર્યાવરણ માટે મોટો ફટકો ગણાવ્યો છે. ગામના અગ્રણી જીતુભાઈ પટેલે આ વિસ્તારને ફરી બેઠો કરવાની નેમ વ્યક્ત કરી છે, જ્યારે સ્થાનિક ગ્રામજનો આ આગ અકસ્માત છે કે કોઈનું તોફાન, તે જાણવા માટે તટસ્થ તપાસની માંગ કરી રહ્યા છે.
Author: geogujaratnews
geogujarat2020@gmail.com www.geogujaratnews.com