અંકલેશ્વરના અંદાડા ગામે ધોળે દિવસે પશુધનની ચોરી કરી તરખાટ મચાવનાર તસ્કર ટોળકી વિરુદ્ધ અંકલેશ્વર બી-ડિવિઝન પોલીસે લાલ આંખ કરી છે. અંદાડાના બોરિંગ ચોક જેવા રહેણાંક વિસ્તારમાં ત્રાટકેલા આ રીઢા ગુનેગારોએ રજનીકાંત પટેલ અને દીપાબેન પટેલના આંગણે બાંધેલા ચાર કિંમતી બકરાઓની ઉઠાંતરી કરી પશુપાલકોની મહેનત પર પાણી ફેરવી દીધું હતું. ૨૦,૦૦૦ની કિંમતના પશુઓની ચોરી કરી પલાયન થઈ જવાની આ ઘટનાએ સ્થાનિકોમાં ભારે રોષ જગાવ્યો હતો, પરંતુ ખાખીના ખૌફ આગળ તસ્કરોની ચાલાકી લાંબો સમય ટકી શકી નથી. પોલીસે આ ગુનામાં ટેકનિકલ સર્વેલન્સ અને બાતમીદારોનું જાળ બિછાવીને અગાઉ બે શખ્સોને જેલના સળિયા પાછળ ધકેલી દીધા હતા, પરંતુ આ ગેંગનો વધુ એક સાગરીત પોલીસને હાથતાળી આપી રહ્યો હતો. 
આખરે, તપાસનો ધમધમાટ તેજ કરી બી-ડિવિઝન પોલીસે લોકેશન ટ્રેસ કરીને આ કેસના ત્રીજા આરોપી ગિરીશ જાયા તળપદાને નડિયાદના ચોક્કસ ઠેકાણેથી દબોચી લીધો છે. પોલીસની આ ત્વરિત કાર્યવાહીએ સ્પષ્ટ કર્યું છે કે ગુનેગારો ભલે ગમે તેટલા દૂર ભાગે, પણ કાયદાના લાંબા હાથ તેમને શોધી જ કાઢે છે. હાલમાં ઝડપાયેલા આ આરોપીની સઘન પૂછપરછ હાથ ધરવામાં આવી છે. પોલીસ હવે એ દિશામાં તપાસ ચલાવી રહી છે કે આ ગેંગમાં અન્ય કેટલા સાગરીતો છે અને પંથકમાં થયેલી પશુચોરીની અન્ય ઘટનાઓમાં આ ટોળકીનો હાથ છે કે કેમ. આ સફળ ઓપરેશન બાદ અંદાડા પંથકના રહીશોએ હાશકારો અનુભવ્યો છે.
Author: geogujaratnews
geogujarat2020@gmail.com www.geogujaratnews.com