ભરૂચમાં આપનો ચૂંટણી શંખનાદ, સ્થાનિક સ્વરાજ્યની જંગ માટે ઉમેદવારોનું મંથન શરૂ, ચૈતર વસાવાની હાજરીમાં લેવાયા ઇન્ટરવ્યૂ..

આગામી સ્થાનિક સ્વરાજ્યની ચૂંટણીઓને લઈને રાજકીય વર્તુળોમાં તૈયારીઓનો દોર શરૂ થઈ ગયો છે. આમ આદમી પાર્ટીએ આ વખતે પૂરી તાકાત સાથે મેદાનમાં ઉતરવાની વ્યૂહરચના ઘડી છે, જેના ભાગરૂપે ભરૂચની એક ખાનગી હોટલમાં ઉમેદવારોની પસંદગી માટે હાઈપ્રોફાઈલ ઇન્ટરવ્યૂ પ્રક્રિયા હાથ ધરવામાં આવી હતી. આ પ્રક્રિયામાં ભરૂચ જિલ્લાના ખૂણેખૂણેથી મોટી સંખ્યામાં દાવેદારો અને ઉત્સાહી કાર્યકરો ઉમટી પડ્યા હતા, જે પક્ષની વધતી સક્રિયતાના સંકેત આપે છે.આ મહત્વપૂર્ણ બેઠકમાં ડેડિયાપાડાના લોકપ્રિય ધારાસભ્ય ચૈતર વસાવા, સાઉથ ઝોન પ્રભારી રામ ધડુક સહિતના દિગ્ગજ નેતાઓ પેનલના સભ્યો તરીકે ઉપસ્થિત રહ્યા હતા. પક્ષ દ્વારા ઉમેદવારોની પસંદગી માટે કડક માપદંડો નિર્ધારિત કરવામાં આવ્યા છે, જેમાં માત્ર લોકપ્રિયતા જ નહીં પરંતુ પક્ષની વિચારધારા પ્રત્યેની વફાદારી, સંગઠન ક્ષમતા અને અત્યાર સુધી કરેલા સામાજિક કાર્યોને પ્રાધાન્ય આપવામાં આવ્યું છે.નેતાઓએ કાર્યકરોને સંબોધતા સ્પષ્ટ કર્યું હતું કે, ભરૂચ જિલ્લાની તમામ બેઠકો પર મજબૂત ઉમેદવારો ઉતારીને ભાજપ-કોંગ્રેસ સામે મજબૂત વિકલ્પ પૂરો પાડવામાં આવશે. ધારાસભ્ય ચૈતર વસાવાએ સંગઠનને બૂથ સ્તર સુધી મજબૂત કરવા અને જનતાના પાયાના પ્રશ્નોને વાચા આપવા પર ભાર મૂક્યો હતો. આપના આ આક્રમક તેવર અને ઉમેદવારોની ચકાસણીની આ પદ્ધતિએ અન્ય રાજકીય પક્ષોમાં પણ ચર્ચાઓ જગાવી છે. હવે જોવાનું એ રહેશે કે, આ પ્રક્રિયા બાદ કયા નવા ચહેરાઓને ચૂંટણીના મેદાનમાં તક મળે છે.