પશ્ચિમ એશિયામાં વધી રહેલા ભૌગોલિક-રાજકીય તણાવ અને યુદ્ધની સ્થિતિ વચ્ચે ભારત માટે ઊર્જા સુરક્ષાને લઈને ખૂબ જ મહત્વપૂર્ણ અને રાહતભર્યા સમાચાર સામે આવ્યા છે. સંયુક્ત આરબ અમીરાત (UAE) થી ભારતીય ધ્વજ ધરાવતું એક વિશાળ ઓઈલ ટેન્કર Jag Ladki સુરક્ષિત રીતે ભારત આવવા માટે રવાના થઈ ગયું છે. આ સમાચાર એવા સમયે આવ્યા છે જ્યારે ખાડી દેશોમાં અનિશ્ચિતતાનો માહોલ છે, પરંતુ ભારતનો ક્રૂડ ઓઈલનો પુરવઠો યથાવત જળવાઈ રહ્યો હોવાના આ સંકેત છે. વિગતો મુજબ, જગ લાડકી નામનું આ તેલ ટેન્કર અબુ ધાબીના પ્રખ્યાત ફુજૈરાહ બંદરેથી લગભગ 80,800 ટન મુર્બન કાચું તેલ ભરીને ભારત તરફ આગળ વધી રહ્યું છે. ભારતીય સમય અનુસાર, આજે સવારે અંદાજે 10:30 વાગ્યે આ જહાજે ફુજૈરાહથી પ્રસ્થાન કર્યું હતું.
ઉલ્લેખનીય છે કે, મુર્બન ક્રૂડ તેની ગુણવત્તા માટે જાણીતું છે અને ભારતીય રિફાઇનરીઓ માટે તે અત્યંત ઉપયોગી માનવામાં આવે છે. પશ્ચિમ એશિયામાં યુદ્ધના ભણકારા વચ્ચે દરિયાઈ માર્ગો પર જોખમ વધી રહ્યું છે, ત્યારે ભારતીય ધ્વજ સાથેના જહાજનું સુરક્ષિત પ્રસ્થાન ભારતની મજબૂત વિદેશ નીતિ અને ખાડી દેશો સાથેના દ્વિપક્ષીય સંબંધોની સફળતા દર્શાવે છે. આ તેલનો જથ્થો આગામી દિવસોમાં ભારતીય બંદરે પહોંચશે, જેનાથી સ્થાનિક બજારમાં ઈંધણના પુરવઠાને મોટી મદદ મળશે.
Author: Naeem Diwan
Owner Of Geogujaratnews.com