આમોદ શહેરમાંથી એક પ્રેરણાદાયી ઘટના સામે આવી છે, જે દરેક માટે ગર્વ અને આશ્ચર્યની લાગણી ઉભી કરે છે. આમોદના સુકૂન સોસાયટી, કાકુજી ની વાડી પાસે રહેતી નાનકડી બાળકી આયાત ઇમ્તિયાઝ મુલતાનીએ માત્ર ધોરણ ૨ માં અભ્યાસ કરતી નાની ઉંમરે પવિત્ર રમઝાન માસ દરમિયાન તમામ રોજા પૂર્ણ કરીને અડગ ઈમાન અને સંકલ્પશક્તિનો અનોખો દાખલો રજૂ કર્યો છે.
નાની ઉંમર હોવા છતાં, આયાતે એકપણ દિવસ ચૂક્યા વિના રોજા રાખીને પોતાના મનોબળ અને શ્રદ્ધાનો પરિચય આપ્યો છે. ખાસ કરીને ગરમીના દિવસોમાં જ્યાં મોટા લોકો માટે પણ રોજા રાખવા મુશ્કેલ બને છે, ત્યાં આ નાનકડી દીકરીએ વહેલી સવારથી સાંજ સુધી અન્ન અને જળનો ત્યાગ કરીને ઈબાદતમાં પોતાને સમર્પિત રાખી હતી.ઈફ્તારના પવિત્ર સમયે આયાતે દેશ અને દુનિયામાં અમન અને શાંતિ માટે દિલથી દુઆઓ પણ માંગી હતી. તેની આ સિદ્ધિથી પરિવારજનોમાં ખુશીની લાગણી છવાઈ ગઈ હતી. પરિવાર દ્વારા ફૂલહાર પહેરાવી અને મીઠાઈ ખવડાવીને તેનું હર્ષોઉલ્લાસ સાથે સ્વાગત કરવામાં આવ્યું હતું.
પરિવારજનોનું કહેવું છે કે, આટલી નાની ઉંમરે આવી શ્રદ્ધા, નિયમિતતા અને સંકલ્પશક્તિ ખરેખર દરેક માટે પ્રેરણાસ્ત્રોત સમાન છે.આમોદના સુકૂન સોસાયટી વિસ્તારમાં આયાતની આ સિદ્ધિ માત્ર તેના પરિવાર પૂરતી સીમિત નથી રહી, પરંતુ સમગ્ર સમાજ માટે ગર્વ અને પ્રેરણાનો વિષય બની છે — એક એવો સંદેશ આપી રહી છે કે સાચી શ્રદ્ધા અને સંકલ્પ માટે ઉંમર ક્યારેય અડચણ બની શકતી નથી.
Author: Yasin Diwan
સમાચાર તેમજ જાહેરાત આપવા માટે સંપર્ક કરો : 9574469023