જનસેવા અને ભક્તિનો સંગમ, આમોદથી સાળંગપુર-બોટાદ નવી બસ સેવા શરૂ કરાઈ..

ભરૂચ જિલ્લાના આમોદ શહેરમાંથી આજે જનસેવા અને ભક્તિનો અનોખો સંગમ જોવા મળ્યો હતો, જ્યાં મુસાફરો અને શ્રદ્ધાળુઓ માટે લાંબા સમયની અપેક્ષિત સુવિધા સાકાર થઈ છે.મુસાફરો અને શ્રદ્ધાળુઓની માંગને ધ્યાનમાં રાખીને આમોદથી સાળંગપુર–બોટાદ રૂટ પર નવી બસ સેવાનું પ્રારંભ કરવામાં આવ્યું, જેને ડી.કે. સ્વામી દ્વારા લીલી ઝંડી બતાવી પ્રસ્થાન કરાવવામાં આવ્યું હતું.આ પ્રસંગ માત્ર એક શાસકીય કાર્યક્રમ પૂરતો સીમિત રહ્યો નહોતો, પરંતુ જનતા સાથેની નજીકતા દર્શાવતો જીવંત દૃશ્ય પણ બન્યો હતો. ધારાસભ્ય ડી.કે. સ્વામી પોતે ભાજપના કાર્યકરો અને મુસાફરો સાથે બસમાં બેસીને આમોદથી જંબુસર સુધીની મુસાફરીમાં જોડાયા હતા. આ દરમ્યાન બસમાં હનુમાન ચાલીસાનું પાઠન થતા સમગ્ર વાતાવરણ ભક્તિમય બની ગયું હતું.ધારાસભ્યએ જણાવ્યું હતું કે આ વિસ્તારથી દરરોજ હજારો શ્રદ્ધાળુઓ કષ્ટભંજન હનુમાન મંદિર ખાતે દર્શન માટે જતા હોય છે, ત્યારે આ નવી બસ સેવા તેમને સીધી અને સરળ સુવિધા પૂરું પાડશે. રાજ્ય સરકાર દ્વારા આ માંગ પૂર્ણ કરવામાં આવતા તેમણે આભાર વ્યક્ત કર્યો હતો.નવી સેવા મુજબ બસ દરરોજ સવારે 5:45 કલાકે આમોદથી પ્રસ્થાન કરશે અને બપોરે 12:30 કલાકે સાળંગપુર પહોંચશે, જેના કારણે મુસાફરોને વધુ સુવિધાજનક મુસાફરી ઉપલબ્ધ બનશે.આ નવી બસ સેવા શરૂ થતા મુસાફરો અને શ્રદ્ધાળુઓમાં આનંદ અને ઉત્સાહની લાગણી જોવા મળી રહી છે અને આ પહેલને જનહિતમાં મહત્વપૂર્ણ પગલું માનવામાં આવી રહ્યું છે.આ સાથે જ જંબુસર ડેપોથી દ્વારકા રૂટ સહિત અન્ય બસોને પણ પ્રસ્થાન કરાવવામાં આવ્યું હતું. ડેપો મેનેજર નરેન્દ્રસિંહ રાઠોડ દ્વારા સમયપત્રક અંગે માહિતી આપવામાં આવી હતી.આ સમગ્ર કાર્યક્રમમાં અધિકારીઓ, ભાજપના હોદ્દેદારો અને કાર્યકરો મોટી સંખ્યામાં હાજર રહ્યા હતા, જ્યાં વિકાસ સાથે ભક્તિનો પણ અનોખો અહેસાસ જોવા મળ્યો હતો.