અંકલેશ્વર,
અંકલેશ્વર રૂરલ પોલીસને મળેલી ચોક્કસ બાતમીના આધારે જીતાલી કામધેનુ ઇન્ડસ્ટ્રીયલ-4ના પ્લોટ નં. A/15માં આવેલા ગોડાઉનમાં દરોડો પાડવામાં આવ્યો હતો. આ ગોડાઉનમાં અત્યંત જ્વલનશીલ કેમિકલ્સનો અનઅધિકૃત જથ્થો તેમજ માનવજાતની તંદુરસ્તીને નુકસાન પહોંચાડે તેવા હેઝાર્ડસ વેસ્ટ (અર્ધઘન, ઘન અને પ્રવાહી સ્વરૂપમાં)નો જથ્થો અસુરક્ષિત રીતે સંગ્રહાયેલો મળી આવ્યો હતો.
પોલીસે ગોડાઉનમાંથી ₹2,34,600/-ની કિંમતનું 8,330 લિટર પ્રવાહી અને 43 બેરલ હેઝાર્ડસ વેસ્ટ કબજે કર્યો હતો. આ કેમિકલ વેસ્ટ જ્વલનશીલ હોવા છતાં, ગોડાઉનમાં કોઈ પણ પ્રકારના અગ્નિશામક સાધનો રાખવામાં આવ્યા ન હતા, જે બીજાની જિંદગી જોખમાય તે રીતે રાખવામાં આવ્યું હતું. પોલીસે સ્થળ પરથી આરોપી દિપુકુમાર ચમકલાલ મંડલની ધરપકડ કરી છે અને ગોડાઉનના માલિક જહાંગીરભાઈ સહિત અન્ય આરોપીઓ વિરુદ્ધ ભારતીય ન્યાય સંહિતા હેઠળ ગુનો નોંધી વધુ તપાસ હાથ ધરી છે.
