ભરૂચ: નબીપુર ખાતે સેવા સેતુના બીજા તબક્કામાં જનમેદની ઉમટી, સરકારી યોજનાઓનો લાભ ઘરઆંગણે મળતા ગ્રામજનોમાં ખુશી

સરકારના લોકાભિમુખ વહીવટના અભિગમ હેઠળ આજે નબીપુર ખાતે સેવા સેતુ કાર્યક્રમનો દ્વિતીય તબક્કો અત્યંત ઉત્સાહપૂર્વક યોજાયો હતો. નબીપુર કુમારશાળાના પ્રાંગણમાં આયોજિત આ શિબિરમાં વહીવટી તંત્ર અને જનતા વચ્ચેનો સેતુ વધુ મજબૂત બન્યો હતો. આ એક જ સ્થળેથી વિવિધ સરકારી યોજનાઓ અને વહીવટી સેવાઓનો વડદારો પૂરો પાડવામાં આવતા મોટી સંખ્યામાં લાભાર્થીઓએ તેનો સીધો લાભ લીધો હતો.
આ કાર્યક્રમમાં મુખ્યત્વે આધારકાર્ડ અપડેટ કરવાથી લઈને જાતિ અને આવકના દાખલા, રેશનકાર્ડ, અને આયુષ્માન કાર્ડ જેવી પાયાની જરૂરિયાતોનું સ્થળ પર જ નિરાકરણ લાવવામાં આવ્યું હતું. સામાજિક સુરક્ષા ક્ષેત્રે ગંગા સ્વરૂપ આર્થિક સહાય, વહાલી દીકરી યોજના, અને નિરાધાર વૃદ્ધ સહાય જેવી કલ્યાણકારી યોજનાઓના ફોર્મ સ્વીકારી જરૂરી માર્ગદર્શન પૂરું પાડવામાં આવ્યું હતું.
આ ઉપરાંત, આરોગ્ય વિભાગ દ્વારા મેડિકલ હેલ્થ ચેકઅપ કેમ્પનું પણ સુંદર આયોજન કરાયું હતું, જેમાં ગ્રામજનોના સ્વાસ્થ્યની તપાસ કરવામાં આવી હતી. આસપાસના ગામોનો અભૂતપૂર્વ પ્રતિસાદ માત્ર નબીપુર જ નહીં, પરંતુ પડોશી ગામો જેવા કે બોરી, કરગટ, ઝંઘાર, ઉમરા, અસુરીઆ, હલદર, સેગવા અને બબુંસર થી પણ મોટી સંખ્યામાં લોકો ઉમટી પડ્યા હતા. ગ્રામ પંચાયતના ડેપ્યુટી સરપંચ, સભ્યો, તલાતીઓ તેમજ કુમારશાળાના સ્ટાફ દ્વારા શિસ્તબદ્ધ વ્યવસ્થા અને સહયોગ પૂરો પાડવામાં આવ્યો હતો. કચેરીઓના ધક્કા ખાધા વગર એક જ છત નીચે તમામ પ્રશ્નોનું નિરાકરણ આવતા લોકોએ આ કાર્યક્રમને આવકાર્યો હતો.
સલિમ કદુજી, નબીપુર