વાગરામાં ટ્રાફિકની સમસ્યાનો હવે અંત આવશે, પોલીસનું કડક વલણ, એન્ગલની બહાર વાહન પાર્ક કર્યું તો લોક મારી દંડ વસૂલાશે.

વાગરા P.I એસ.ડી ફુલતરિયાનું કડક વલણ, ટ્રાફિક સમસ્યા હલ કરવા કોઈની પણ શેહશરમ રાખવામાં આવશે નહીં. : વાગરા નગરમાં ટ્રાફિકની સમસ્યાથી પીડાતા લોકોને ટૂંક સમયમાં રાહત મળવાની શક્યતા છે. નગરના બજાર વિસ્તારમાં આડેધડ વાહન પાર્ક કરવાથી થતી અસુવિધાને ધ્યાનમાં લઈને, વાગરા પોલીસે કડક વલણ અપનાવ્યું છે. પોલીસે તાજેતરમાં નગરના તમામ વેપારીઓ સાથે બેઠક યોજી, જેમાં સ્પષ્ટ સૂચના આપવામાં આવી છે કે હવેથી જાહેર માર્ગો પર આડેધડ વાહન પાર્ક કરનારાઓ સામે કડક કાર્યવાહી કરવામાં આવશે.પોલીસે આપી સ્પષ્ટ ચેતવણી : વાગરાના પી.આઈ. એસ.ડી. ફુલતરિયાએ વેપારીઓને બેઠકમાં સંબોધતા કડક શબ્દોમાં જણાવ્યું કે, “જો હવે વાગરા બજારમાં આડેધડ વાહન પાર્ક કર્યું તો ખેર નથી.” તેમણે ઉમેર્યું કે, બજારમાં લગાવેલ એન્ગલની બહાર જો કોઈ પણ વાહન પાર્ક કરેલું જણાશે, તો પોલીસ તાત્કાલિક લોક મારીને દંડ વસૂલ કરશે. આ કાર્યવાહીમાં કોઈ પણ પ્રકારની ભલામણ કે ઓળખાણ ચલાવી લેવામાં આવશે નહીં. આડેધડ પાર્કિંગથી ટ્રાફિક અવરોધાય છે અને રાહદારીઓને પણ ભારે મુશ્કેલીઓનો સામનો કરવો પડે છે, જેની ગ્રામજનોએ ગ્રામસભામાં પણ રજૂઆત કરી હતી.વેપારીઓને પણ સૂચના સાથે જવાબદારી સોંપાઈ : પોલીસે તમામ વેપારીઓ અને દુકાનદારોને પણ પોતાની દુકાન કે વ્યવસાયિક સંસ્થાની આગળ જાહેર રોડ પર કોઈ પણ વાહન પાર્ક ન કરવા દેવા માટે સ્પષ્ટ સૂચના આપી છે. આ પગલાનો મુખ્ય ઉદ્દેશ્ય વાગરા બજારમાં વાહનવ્યવહારને સુગમ બનાવવાનો અને રાહદારીઓની સલામતી સુનિશ્ચિત કરવાનો છે. પોલીસની આ કડક કાર્યવાહીથી વાગરાના ટ્રાફિકની સમસ્યાનો અંત આવશે તેવી આશા સેવવામાં આવી રહી છે. વેપારીઓ અને નાગરિકોના સહયોગથી જ આ નિયમોનું સફળતાપૂર્વક પાલન થઈ શકશે.શાંતિ સમિતિની બેઠક અને પોલીસનો બંદોબસ્ત : ઉલ્લેખનીય છે કે, વાગરામાં ઇદે મિલાદ અને ગણેશ વિસર્જન જેવા બે મહત્ત્વપૂર્ણ પર્વોની ઉજવણી થવાની છે. આ દરમિયાન કાયદો અને વ્યવસ્થા જળવાઈ રહે તે માટે પણ પોલીસે શાંતિ સમિતિની બેઠક યોજી હતી. આ બેઠકમાં બંને સમાજના આગેવાનોએ સહકારની ખાતરી આપી હતી. પોલીસ દ્વારા તહેવારોના માહોલ વચ્ચે પણ ટ્રાફિકના નિયમોનું કડક પાલન કરાવવામાં આવશે, જેથી નાગરિકોને કોઈ અસુવિધા ન પડે. પોલીસની આ કડક કાર્યવાહીથી વાગરાના ટ્રાફિકની સમસ્યાનો અંત આવશે અને નગરમાં શિસ્તબદ્ધ વાતાવરણ ઊભું થશે તેવી આશા સેવવામાં આવી રહી છે.