જંબુસર: નોબાર-ધોરી પરબ વચ્ચે કાળ બનીને આવેલી ફોરવ્હીલરે બાઈકને ફંગોળી, એકનું કરુણ મોત નીપજયું

જંબુસર તાલુકામાં દિવસેને દિવસે વધતા જતા માર્ગ અકસ્માતોની હારમાળામાં વધુ એક લોહિયાળ અકસ્માતનો ઉમેરો થયો છે. નોબાર અને ધોરી પરબ ગામ વચ્ચેના માર્ગ પર આજે વહેલી સવારે સર્જાયેલી એક ભયાનક દુર્ઘટનામાં બાઈક સવાર આધેડે પોતાનો જીવ ગુમાવતા નોબાર ગામમાં ઘેરા શોકની લાગણી પ્રસરી ગઈ છે. પ્રાપ્ત માહિતી અનુસાર, નોબાર ગામના રહેવાસી રમેશભાઈ ગુલાબભાઈ અને તેમની સાથે તડપડભાઈ સોલંકી નામના વ્યક્તિ પોતાની મોટરસાયકલ પર સવાર થઈને કોઈ અંગત કામ અર્થે નોબાર-ધોરી પરબ રોડ પરથી પસાર થઈ રહ્યા હતા. આ દરમિયાન સામેથી પૂરઝડપે અને ગફલતભરી રીતે આવી રહેલી એક ફોરવ્હીલર કારના ચાલકે સ્ટેયરિંગ પરથી કાબૂ ગુમાવતા બાઈક સાથે સામસામે ભીષણ ટક્કર થઈ હતી. ટક્કર એટલી જોરદાર હતી કે બાઈક સવાર બંને વ્યક્તિઓ રોડ પર ફંગોળાયા હતા.આ ગમખ્વાર અકસ્માતમાં રમેશભાઈ ગુલાબભાઈને માથાના ભાગે અને શરીરે જીવલેણ ઈજાઓ પહોંચી હતી, જેના કારણે લોહીલુહાણ હાલતમાં તેમનું ઘટનાસ્થળે જ કરુણ મૃત્યુ નીપજ્યું હતું. જ્યારે તેમની પાછળ બેઠેલા તડપડભાઈ સોલંકીને પણ ગંભીર ઈજાઓ પહોંચતા તેઓ કરાહતા હાલતમાં રોડ પર પડ્યા હતા. સ્થાનિકોએ તરત જ ૧૦૮ એમ્બ્યુલન્સને જાણ કરી હતી, જેના દ્વારા ઇજાગ્રસ્તને તાત્કાલિક જંબુસરની સબ-ડિસ્ટ્રિક્ટ હોસ્પિટલમાં ખસેડવામાં આવ્યા છે. હાલ તેમની સ્થિતિ નાજુક હોવાનું જાણવા મળ્યું છે. અકસ્માતની જાણ થતા જ જંબુસર પોલીસનો કાફલો ઘટનાસ્થળે પહોંચી ગયો હતો અને ટ્રાફિક ક્લિયર કરાવી તપાસ હાથ ધરી હતી. પોલીસે મૃતક રમેશભાઈના મૃતદેહને પોસ્ટમોર્ટમ માટે હોસ્પિટલ મોકલી આપી અકસ્માતનો ગુનો નોંધવાની તજવીજ શરૂ કરી છે. પૂરઝડપે વાહન ચલાવતા વાહનચાલકો સામે કડક પગલાં લેવા માટે સ્થાનિકોમાં માંગ ઉઠી છે.