આમોદ તાલુકાના કોલવણા ગામ, તા. 6 મે (બુધવાર): ગ્રામ્ય વિસ્તારમાં શિક્ષણનું સ્તર શહેરોને ટક્કર આપી શકે છે તેવી સાબિતી આપતા ધી સાર્વજનિક હાઇસ્કૂલ કોલવણાએ આ વર્ષના ધોરણ 10 અને 12ના બોર્ડ પરિણામમાં સળંગ 100 ટકા સફળતા મેળવી ઇતિહાસ રચ્યો છે. શાળામાંથી એક પણ વિદ્યાર્થી નાપાસ ન થતા સમગ્ર પંથકમાં ગૌરવની લાગણી ફેલાઈ ગઈ.આસપાસના પાંચ ગામોના વિદ્યાર્થીઓ માટે શિક્ષણનું કેન્દ્ર બનેલી આ સંસ્થાએ સતત ઉત્તમ પરિણામો આપવાની પોતાની પરંપરા જાળવી રાખી છે. શાળાના શૈક્ષણિક વાતાવરણ અને શિક્ષકોના સમર્પણને કારણે જ વાલીઓમાં સંસ્થા પ્રત્યે અતૂટ વિશ્વાસ જોવા મળે છે. ધોરણ 10ના પરિણામમાં મોહમ્મદઆમીર ઝફર પટેલે 91.33%ના જંગી ગુણ સાથે પ્રથમ ક્રમે આવીને શાળાનું ગૌરવ વધાર્યું. તેણે માત્ર પોતાનું જ નહીં, પરંતુ સમગ્ર શાળાનું માન વધાર્યું છે. મહેમદફેઝાન જાદવ 87% સાથે બીજા સ્થાને અને ફરહીન પટેલ 86.50% સાથે ત્રીજા સ્થાને રહ્યા. ખાસ કરીને 90%થી ઉપરના ગુણ મેળવનાર મોહમ્મદઆમીરની સિદ્ધિએ ગ્રામ્ય વિસ્તારમાં પણ ગુણવત્તાયુક્ત શિક્ષણ શક્ય છે, તેવો શાબાશી સંદેશ આપ્યો છે.
ધોરણ 12ના પરિણામમાં ફરી એક વાર દીકરીઓએ બાજી મારી છે. ખુશી મકવાણાએ 86.71% મેળવીને પ્રથમ સ્થાન હાંસલ કર્યું, તો ફાતિમા પટેલે 83.71% સાથે દ્વિતીય અને જીયા ગોહિલે 80.43% સાથે તૃતીય સ્થાન મેળવીને ત્રિપુટિની આગેવાની સંભાળી. આ ત્રણેય હોનહાર વિદ્યાર્થીનીઓએ સાબિત કર્યું કે જો તક અને માર્ગદર્શન મળે તો ગામડાની દીકરીઓ પણ કોઈ પાછળ નથી.
સદીના આ પરિણામથી શાળા પરિવારમાં આનંદનો માહોલ છે. શાળાના આચાર્ય, સમગ્ર શિક્ષકગણ અને ટ્રસ્ટીઓએ તમામ ઉત્તીર્ણ વિદ્યાર્થીઓને અભિનંદન પાઠવ્યા. ગામના સરપંચ ઝફર ગડીમલે શુભેચ્છા આપતા કહ્યું, “કોલવણાની હાઈસ્કૂલ સમગ્ર પંથકની શાન છે. ફરી એક વાર સો ટકા પરિણામ આપીને ગ્રામ્ય વિસ્તારમાં શિક્ષણનો દીવડો જગાવ્યો છે.” આ સફળતા એ દર્શાવે છે કે ગ્રામ્ય વિસ્તારોમાં પણ ગુણવત્તાયુક્ત શિક્ષણનો સૂર્ય ઉગી રહ્યો છે.
Author: Yasin Diwan
સમાચાર તેમજ જાહેરાત આપવા માટે સંપર્ક કરો : 9574469023