આમોદની મિશ્ર શાળા નંબર-૨નું પરિસર સોમવારે ‘કન્યા કેળવણી મહોત્સવ અને શાળા પ્રવેશોત્સવ-૨૦૨૫-૨૬’ની ભવ્ય ઉજવણી સાથે ઉત્સવમય બની ગયું હતું. શાળામાં પ્રથમવાર પ્રવેશ મેળવનારા નાનકડા ભૂલકાઓનું ઉષ્માભર્યું સ્વાગત કરવામાં આવ્યું હતું, જેમના ચહેરા પર નિર્દોષ સ્મિત અને આંખોમાં ઉજ્જવળ ભવિષ્યના સપનાઓ જોવા મળતા હતા.
કાર્યક્રમના અધ્યક્ષ સ્થાને રહેલા જંબુસરના ધારાસભ્ય ડી. કે. સ્વામીએ દીપ પ્રાગટ્ય કરીને પ્રવેશોત્સવને ખુલ્લો મુક્યો હતો. આ પ્રસંગે તેમણે વિદ્યાર્થીઓને દફતર અને યુનિફોર્મ અર્પણ કરીને તેમના શિક્ષણપ્રવાસની શરૂઆત માટે શુભેચ્છાઓ પાઠવી હતી. પોતાના સંબોધનમાં ધારાસભ્યએ શિક્ષણના મહત્વ પર ભાર મૂકતા જણાવ્યું હતું કે, શાળાનો આ પ્રથમ દિવસ બાળકના સપનાઓને સાકાર કરવાની દિશામાં ભરાતું એક મક્કમ પગલું છે, જે વ્યક્તિ, પરિવાર અને સમાજનું ભવિષ્ય ઘડી શકે છે.
આમોદ તાલુકાની ૩૨ જેટલી પ્રાથમિક, માધ્યમિક અને રેસિડેન્શિયલ શાળાઓમાં ૨૨ થી ૨૫ જૂન દરમિયાન આ મહોત્સવનું આયોજન કરવામાં આવ્યું છે. આ અભિયાનનો મુખ્ય ઉદ્દેશ્ય દરેક બાળકને શિક્ષણની મુખ્યધારા સાથે જોડવાનો, કન્યા શિક્ષણને પ્રોત્સાહન આપવાનો અને વાલીઓમાં શિક્ષણ પ્રત્યે જાગૃતિ લાવવાનો છે.શાળાના શિક્ષકો, વાલીઓ અને સ્થાનિક આગેવાનોની પ્રેરક ઉપસ્થિતિમાં કાર્યક્રમનું સમાપન વિદ્યાર્થીઓને શૈક્ષણિક કિટના વિતરણ સાથે કરવામાં આવ્યું હતું. શિક્ષણ પ્રત્યેની પ્રતિબદ્ધતા અને નવી પેઢીના ઘડતરનો સંદેશ આપતો આ પ્રવેશોત્સવ આમોદ માટે એક યાદગાર ઘટના બની રહ્યો હતો.
Author: Yasin Diwan
સમાચાર તેમજ જાહેરાત આપવા માટે સંપર્ક કરો : 9574469023