ગુજરાતભરમાં ડ્રગ્સ અને નશાકારક પદાર્થોની ગેરકાયદે હેરાફેરી સામે ચાલી રહેલી કડક ઝુંબેશ અંતર્ગત ભરૂચ સ્પેશિયલ ઓપરેશન ગ્રુપ (SOG)ને મોટી સફળતા સાંપડી છે. અમદાવાદ ડીસીબી ક્રાઈમ પોલીસ સ્ટેશનમાં નોંધાયેલા કરોડોના એનડીપીએસ (NDPS) કેસમાં છેલ્લા ૨ વર્ષથી પોલીસને છાપરે ચડીને નાસતો ફરતો માથાભારે વોન્ટેડ આરોપી ભરૂચ SOGની કડક કાર્યવાહીમાં પાલેજ ખાતેથી ઝડપાઈ ગયો છે. અમદાવાદ ડીસીબી ક્રાઈમ શાખાએ વર્ષ ૨૦૨૪માં સપ્ટેમ્બર મહિના દરમિયાન દરોડો પાડીને ૪૨ લાખની કિંમતનો ૧૯૪.૮૫૦ કિલોગ્રામ જેટલો માતબર ગાંજાનો જથ્થો પકડી પાડ્યો હતો, જેમાં પાલેજનો વસીમખાન પઠાણ મુખ્ય સૂત્રધાર તરીકે પોલીસ ચોપડે ચડેલો હતો પરંતુ તે સતત ધરપકડથી બચવા ભૂગર્ભમાં ઉતરી ગયો હતો. દરમિયાન, ભરૂચ SOGની ટીમને ચોક્કસ અને ગુપ્ત બાતમી મળી હતી કે કરોડોના ડ્રગ્સ કેસનો આ શાતિર આરોપી વસીમખાન પઠાણ હાલ પાલેજ સ્થિત પોતાના નિવાસસ્થાને છુપાયેલો છે. બાતમીના આધારે SOGની ટીમે વિલંબ કર્યા વિના પાલેજમાં ઘેરાબંધી કરીને દરોડો પાડ્યો હતો અને ફરાર આરોપીને દબોચી લીધો હતો. આ હાઈ-પ્રોફાઈલ ડ્રગ્સ નેટવર્કના મુખ્ય સાગરીતની ધરપકડથી નશાના કારોબાર સાથે જોડાયેલા અન્ય તત્વોમાં ભારે ફફડાટ વ્યાપી ગયો છે. ભરૂચ SOG દ્વારા પકડાયેલા આરોપીની આગળની કાયદાકીય પ્રોસેસ પૂરી કરી તેને અમદાવાદ ડીસીબી ક્રાઈમ પોલીસને સોંપવાની તજવીજ હાથ ધરવામાં આવી છે.
Author: geogujaratnews
geogujarat2020@gmail.com www.geogujaratnews.com