વાગરા તાલુકાના કડોદરા ગામે શિક્ષણ ક્ષેત્રે સમાજસેવાની એક અનોખી અને પ્રેરણાદાયી મિસાલ જોવા મળી છે. કડોદરા વિભાગ વિકાસ મંડળ સંચાલિત શ્રી શારદા વિદ્યામંદિર (માધ્યમિક અને ઉચ્ચતર માધ્યમિક વિભાગ) ખાતે એક ઉદાર દિલના દાતાશ્રી દ્વારા શાળાના બાળકો માટે ૨૫ નવી આધુનિક બેન્ચનું સહર્ષ દાન આપવામાં આવ્યું છે. વર્તમાન સમયમાં જ્યાં નાની-મોટી મદદ બદલ પણ જાહેરાત અને સન્માનનો મોહ રાખવામાં આવે છે, ત્યાં આ દાતાશ્રીએ કોઈપણ પ્રકારના જાહેર સ્વાગત, સન્માન કે પ્રસિદ્ધિની અપેક્ષા રાખ્યા વિના માત્ર વિદ્યાર્થીઓના હિતને જ સર્વોપરી ગણીને આ ઉમદા કાર્ય કર્યું છે.
શાળામાં આ નવી બેન્ચ ઉપલબ્ધ થવાથી બાળકો માટે અભ્યાસનું વાતાવરણ વધુ સુવિધાયુક્ત અને આરામદાયક બનશે. ખાસ કરીને શાળાના ડિજિટલ સ્માર્ટ ક્લાસરૂમમાં યોગ્ય બેઠક વ્યવસ્થા મળવાથી વિદ્યાર્થીઓ વધુ ધ્યાનપૂર્વક અને ઉત્સાહથી અભ્યાસ કરી શકશે, જેનાથી શિક્ષણની એકંદર ગુણવત્તામાં પણ સકારાત્મક સુધારો જોવા મળશે. દાતાશ્રીના આ સાચા અર્થમાં નિસ્વાર્થ સહયોગથી વિદ્યાર્થીઓ અને શિક્ષકોમાં ભારે હર્ષની લાગણી વ્યાપી ગઈ છે.
આ પ્રશંસનીય અને ભામાશા જેવા ઉમદા કાર્ય બદલ શ્રી કડોદરા વિભાગ વિકાસ મંડળના ચેરમેનશ્રી, મંડળના તમામ હોદ્દેદારો તેમજ શાળાના આચાર્ય અને સમગ્ર શૈક્ષણિક પરિવારે દાતાશ્રી સંસ્થાનો હૃદયપૂર્વક આભાર વ્યક્ત કર્યો હતો. શાળા પરિવારે આ તકે જણાવ્યું હતું કે, જ્યારે સમાજના આવા સેવાભાવી અને શિક્ષણપ્રેમી દાતાઓ આગળ આવે છે, ત્યારે જ ગ્રામીણ વિસ્તારના બાળકોને ઉત્તમ સવલતો મળી રહે છે. આવા સહયોગથી શિક્ષણનું ક્ષેત્ર વધુ મજબૂત બનશે અને બાળકોના ઉજ્જવળ ભવિષ્યના નિર્માણમાં તે નિર્ણાયક સાબિત થશે.
Author: Naeem Diwan
Owner Of Geogujaratnews.com