વાગરા: સાયખા GIDCમાં કંપનીઓના પ્રદૂષણથી હવામાં ઝેર? Hexahub Pharmachem અને Hridol Chemical સામે આક્ષેપો, વારંવાર ફરિયાદો છતાં GPCBની કાર્યવાહી સામે સવાલો

વાગરા તાલુકાના સાયખા GIDC વિસ્તારમાં Hexahub Pharmachem Pvt. Ltd. અને Hridol Chemical Pvt. Ltd. કંપનીઓ દ્વારા હવામાં પ્રદૂષણ ફેલાવાતું હોવાના આક્ષેપો સામે આવ્યા છે. સ્થાનિકો અને આસપાસના લોકો દ્વારા વારંવાર પ્રદૂષણ અંગે ફરિયાદો કરવામાં આવી હોવા છતાં સમસ્યાનો કાયમી ઉકેલ ન આવતાં તંત્રની કામગીરી સામે ગંભીર સવાલો ઊભા થયા છે.સ્થાનિકોના આક્ષેપ મુજબ કંપનીઓમાંથી નીકળતા ધુમાડા અથવા વાયુના કારણે આસપાસના વિસ્તારમાં હવાની ગુણવત્તા અંગે ચિંતા સર્જાઈ રહી છે. જો આક્ષેપો સાચા હોય તો ઔદ્યોગિક પ્રદૂષણ માત્ર પર્યાવરણ પૂરતું સીમિત ન રહી લોકોના આરોગ્ય માટે પણ જોખમ ઊભું કરી શકે છે. ત્યારે સવાલ એ છે કે વારંવાર ફરિયાદો બાદ પણ સંબંધિત વિભાગ દ્વારા સ્થળ તપાસ, હવાના નમૂના, ઉત્સર્જનના માપદંડોની ચકાસણી અને નિયમોનું પાલન થાય છે કે નહીં તેની કડક તપાસ કેમ થતી નથી?આ સમગ્ર મામલે ગુજરાત પ્રદૂષણ નિયંત્રણ બોર્ડની ભૂમિકા પણ ચર્ચામાં આવી છે. ફરિયાદો થતી રહે અને કાર્યવાહી માત્ર કાગળ પર જ સીમિત રહે તો ઔદ્યોગિક પ્રદૂષણ પર અંકુશ કેવી રીતે આવશે? સ્થાનિકોમાં હવે એ સવાલ ઉઠી રહ્યો છે કે તંત્ર કોઈ મોટી ઘટના બનવાની રાહ જોઈ રહ્યું છે કે પછી સમયસર તપાસ કરીને જવાબદારી નક્કી કરશે? હવે GPCB દ્વારા બંને કંપનીઓની તાત્કાલિક સ્થળ તપાસ કરી વાસ્તવિક પરિસ્થિતિની ચકાસણી, જરૂરી નમૂનાઓની તપાસ અને નિયમોનું ઉલ્લંઘન જણાય તો જવાબદાર સામે કાયદેસરની કાર્યવાહી કરવામાં આવે તેવી માંગ ઉઠી છે. જોકે, કંપનીઓ તરફથી આ આક્ષેપો અંગે કોઈ સ્પષ્ટ પ્રતિભાવ ઉપલબ્ધ ન હોવાથી અંતિમ હકીકત સત્તાવાર તપાસ બાદ જ સ્પષ્ટ થશે.