ભરૂચ જિલ્લાના વાગરા તાલુકાના દહેજમાં રિલાયન્સ ગેટ નંબર-4 નજીક માર્ગ અકસ્માતની હૃદયદ્રાવક ઘટના સામે આવી છે. ટેન્કરની અડફેટે બાઈક પર સવાર મહિલા ડોક્ટરનું મોત નીપજતાં સમગ્ર પંથકમાં અરેરાટી ફેલાઈ ગઈ છે. સૌથી કરુણ બાબત એ છે કે મહિલા ડોક્ટરે પોતાના પતિની નજર સામે જ જીવ ગુમાવ્યો હતો. જે સફર સામાન્ય રીતે શરૂ થઈ હતી, તે પળવારમાં પરિવાર માટે ક્યારેય ન ભૂલી શકાય તેવી કરુણાંતિકામાં ફેરવાઈ ગઈ હતી. 
મળતી માહિતી મુજબ, બિંદુદેવી સંજુ મિશ્રા નામનાં મહિલા ડોક્ટર પોતાના પતિ સાથે બાઈક પર જઈ રહ્યાં હતાં. આ દરમિયાન રિલાયન્સ ગેટ નંબર-4 નજીક એક ટેન્કરે તેમની બાઈકને અડફેટે લેતાં મહિલા ડોક્ટરને ગંભીર ઇજાઓ પહોંચી હતી અને તેમનું મોત નીપજ્યું હતું. અકસ્માતની ઘટનાએ ફરી એકવાર ઔદ્યોગિક વિસ્તારના માર્ગો પર ભારે વાહનોની અવરજવર અને માર્ગ સલામતીના સવાલો ઊભા કર્યા છે.
અકસ્મત બાદ ટેન્કરચાલક વાહન સ્થળ પર મૂકીને ફરાર થઈ જતાં જવાબદારી અને કાયદાના અમલ સામે પણ સવાલો ઊભા થયા છે. અકસ્માત સર્જીને ચાલકનું ફરાર થઈ જવું અત્યંત ગંભીર બાબત છે. જોકે, અકસ્માત પાછળનું ચોક્કસ કારણ અને ચાલકની ભૂમિકા પોલીસ તપાસ બાદ જ સ્પષ્ટ થશે. ઘટનાની જાણ થતાં દહેજ પોલીસ તાત્કાલિક સ્થળ પર પહોંચી હતી અને આગળની કાર્યવાહી હાથ ધરી હતી. હવે પોલીસ ફરાર ટેન્કરચાલકને શોધી કાયદેસરની કાર્યવાહી કરે તે જરૂરી છે. એક પરિવારની ખુશીઓ છીનવાઈ ગઈ છે અને પતિએ પોતાની નજર સામે પત્નીને ગુમાવવાની અસહ્ય વેદના સહન કરવી પડી છે. આ કરુણ ઘટના ફરી એકવાર સવાલ કરે છે કે રસ્તા પર એક બેદરકારીની કિંમત આખા પરિવારને જીવનભર કેમ ચૂકવવી પડે?
Author: Naeem Diwan
Owner Of Geogujaratnews.com