ભરૂચ જિલ્લાના પાલેજ નજીક આવેલા ટંકારીયા ગામે એક હૃદયદ્રાવક ઘટના સામે આવી છે. મંડપનું કપડું ધોવા માટે કેનાલ પર ગયેલા 22 વર્ષીય યુવકનું પાણીમાં ડૂબી જવાથી કરુણ મોત નીપજતાં સમગ્ર ગામમાં શોકની લહેર ફરી વળી છે. રોજિંદા કામ માટે ગયેલા યુવકનું અચાનક મોત થતાં પરિવારજનો પર જાણે આભ તૂટી પડ્યું હોય તેવી સ્થિતિ સર્જાઈ છે. 
પ્રાપ્ત માહિતી અનુસાર, ટંકારીયા ગામના રહેવાસી દશરથ શંકરભાઈ વસાવા મંડપનું કપડું ધોવા માટે ગામ નજીક આવેલી કેનાલ પર ગયા હતા. આ દરમિયાન અચાનક પગ લપસી જતાં તેઓ કેનાલના ઊંડા પાણીમાં ગરકાવ થઈ ગયા હતા. ઘટનાની જાણ થતાં સ્થાનિક લોકોમાં દોડધામ મચી ગઈ હતી, પરંતુ યુવકને બચાવી શકાયો નહોતો અને ડૂબી જવાથી તેમનું મોત નીપજ્યું હતું.
બનાવની જાણ થતાં પાલેજ પોલીસનો સ્ટાફ તાત્કાલિક ઘટનાસ્થળે પહોંચ્યો હતો. યુવકના મૃતદેહને કેનાલમાંથી બહાર કાઢી પોસ્ટમોર્ટમ માટે મોકલી આપવામાં આવ્યો હતો. પોલીસે આ મામલે વધુ તપાસ હાથ ધરી છે. બીજી તરફ, યુવાન દીકરાના અચાનક મોતના સમાચાર મળતાં પરિવારજનો પર દુઃખનો પહાડ તૂટી પડ્યો હતો. ઘટનાસ્થળે એકત્ર થયેલા ગ્રામજનો પણ ગમગીન બની ગયા હતા. નાની અમથી બેદરકારી કે અચાનક બનેલી દુર્ઘટના કેવી રીતે એક પરિવારની ખુશીઓ છીનવી શકે છે, તેનો કરુણ ચિતાર આ ઘટનાએ રજૂ કર્યો છે.
Author: Naeem Diwan
Owner Of Geogujaratnews.com