અંકલેશ્વરની આધ્યા હોમ્સ સોસાયટીમાં તસ્કરોનો તરખાટ, બંધ મકાનને નિશાન બનાવી 5.13 લાખના દાગીના-રોકડની ચોરી, અન્ય મકાનોના તાળાં તોડવાનો પણ પ્રયાસ!

અંકલેશ્વર તાલુકાના અંદાડા ગામની આધ્યા હોમ્સ સોસાયટીમાં તસ્કરોએ બંધ મકાનને નિશાન બનાવી લાખો રૂપિયાના દાગીના અને રોકડની ચોરીને અંજામ આપતાં સ્થાનિક વિસ્તારમાં ચકચાર મચી ગઈ છે. મકાનમાલિકની ગેરહાજરીનો લાભ ઉઠાવી તસ્કરોએ ઘરમાં પ્રવેશ કર્યો હતો અને અંદાજે રૂ.5,13,500ની કિંમતના સોના-ચાંદીના દાગીના તથા રોકડ રકમ ચોરી કરી ફરાર થઈ ગયા હતા. એટલું જ નહીં, સોસાયટીનાં અન્ય બંધ મકાનોના તાળાં તોડવાનો પણ પ્રયાસ કરવામાં આવ્યો હોવાનું સામે આવ્યું છે. એક જ સોસાયટીમાં અનેક મકાનોને નિશાન બનાવવાના પ્રયાસથી રહેવાસીઓમાં સુરક્ષાને લઈને ચિંતા ફેલાઈ છે.મકાનમાલિકની ગેરહાજરીનો લાભ લઈ તસ્કરોએ ઘરમાં હાથફેરો કર્યો, એક મકાનમાં ચોરી, અન્ય મકાનોના તાળાં તોડવાનો પણ પ્રયાસ: મળતી માહિતી અનુસાર, આધ્યા હોમ્સ સોસાયટીમાં રહેતા ભૌમિક પટેલ અંગત કારણોસર પોતાના વતન ગયા હતા. મકાન બંધ હોવાની જાણ તસ્કરોને થતાં તેમણે આ તકનો લાભ ઉઠાવ્યો હતો. તસ્કરોએ મકાનમાં પ્રવેશ કરી ઘરમાં રાખેલા સામાનની ઉથલપાથલ કરી સોના-ચાંદીના દાગીના અને રોકડ રકમ ચોરી કરી હતી. આ દરમિયાન પાડોશીની નજર ઘરના ખુલ્લા દરવાજા પર પડતાં તેમણે તાત્કાલિક ભૌમિક પટેલને ફોન કરીને જાણ કરી હતી. ઘરે પરત ફરેલા ભૌમિક પટેલે મકાનની અંદર તપાસ કરતાં સામાન વેરવિખેર હાલતમાં પડ્યો હતો અને કિંમતી ચીજવસ્તુઓ ગાયબ હોવાનું જણાયું હતું. આ ઘટનામાં સૌથી ચિંતાજનક બાબત એ છે કે તસ્કરોએ માત્ર એક મકાન પૂરતું જ નિશાન સીમિત રાખ્યું નહોતું. સોસાયટીનાં અન્ય બંધ મકાનોના તાળાં તોડવાનો પણ પ્રયાસ કરવામાં આવ્યો હોવાનું જાણવા મળ્યું છે. આથી તસ્કરો સોસાયટીમાં કેટલો સમય રહ્યા હતા અને કેટલાં મકાનોની રેકી કરી હતી તે સહિતના મુદ્દાઓ તપાસનો વિષય બન્યા છે. રહેણાક સોસાયટીમાં આ પ્રકારની ઘટનાથી સ્થાનિક રહીશોમાં ફફડાટ ફેલાયો છે.પોલીસ અને FSLની તપાસ શરૂ, CCTV ફૂટેજના આધારે તસ્કરોની શોધ, રહેવાસીઓમાં સુરક્ષાને લઈને ચિંતા: ઘટનાની જાણ થતાં અંકલેશ્વર શહેર બી ડિવિઝન પોલીસની ટીમ તાત્કાલિક સ્થળ પર પહોંચી હતી. પોલીસે ચોરી અંગે ફરિયાદ નોંધી સોસાયટીમાં લગાવેલા CCTV કેમેરાનાં ફૂટેજ તપાસવાની કામગીરી હાથ ધરી છે. આ ઉપરાંત FSLની મદદથી ઘટનાસ્થળેથી વૈજ્ઞાનિક ઢબે પુરાવા એકત્ર કરવાની કાર્યવાહી પણ કરવામાં આવી છે. તસ્કરોની ઓળખ કરી તેમને ઝડપી પાડવા પોલીસે તપાસનો ધમધમાટ શરૂ કર્યો છે. અંદાડાની આધ્યા હોમ્સ સોસાયટીમાં બનેલી આ ઘટના ફરી એકવાર રહેણાક વિસ્તારોની સુરક્ષા વ્યવસ્થા સામે સવાલો ઊભા કરે છે. બંધ મકાનોને નિશાન બનાવી તસ્કરો બિન્દાસ્ત રીતે ચોરીને અંજામ આપવાનો પ્રયાસ કરી રહ્યા હોય ત્યારે સોસાયટીના સુરક્ષા પ્રબંધો અને પોલીસ પેટ્રોલિંગની અસરકારકતા પણ ચર્ચાનો વિષય બને છે. હવે પોલીસ CCTV ફૂટેજ અને FSLના પુરાવાના આધારે તસ્કરો સુધી ક્યારે પહોંચે છે અને ચોરીનો મુદ્દામાલ ક્યારે પરત મળે છે તેના પર સૌની નજર છે.