ભરૂચ જિલ્લાના આમોદ કોર્ટ નજીક માર્ગ પર આવેલા બમ્પર પરથી પસાર થવું એક પરિવાર માટે કાળ સમાન સાબિત થયું છે. વિલાયત ગામના સૈયદ સિરાજભાઈ પોતાની પત્ની સુભાનબીબી સાથે બાઈક પર પાલેજથી આમોદ તરફ જઈ રહ્યા હતા. દરમિયાન આમોદ કોર્ટ પાસે આવેલા બમ્પર પરથી બાઈક પસાર થતી વખતે પાછળ બેઠેલાં સુભાનબીબી અચાનક નીચે પટકાતાં તેમને ગંભીર ઈજાઓ પહોંચી હતી. અકસ્માત બાદ તાત્કાલિક 108 એમ્બ્યુલન્સ મારફતે તેમને આમોદ સામુહિક આરોગ્ય કેન્દ્ર ખાતે સારવાર અર્થે ખસેડવામાં આવ્યાં હતાં, પરંતુ સારવાર દરમિયાન તેમનું મોત નીપજતાં પરિવારની આશાઓ પર પાણી ફરી વળ્યું હતું.
એક બમ્પર પરથી બાઈક પસાર થતાં મહિલાનો જીવ જતો રહેવાની આ ઘટના માત્ર અકસ્માત ગણીને ભૂલી જવા જેવી નથી. આમોદ કોર્ટ જેવા અવરજવરવાળા સ્થળ પાસે આવેલા બમ્પર પર વાહનચાલકોની સુરક્ષા માટે પૂરતી વ્યવસ્થા છે કે નહીં, બમ્પર પહેલાં સ્પષ્ટ ચેતવણી દર્શાવતા સંકેતો મૂકવામાં આવ્યા છે કે નહીં અને બમ્પરની ઊંચાઈ તથા બનાવટ નિયમો મુજબ છે કે નહીં, તેવા ગંભીર સવાલો ઊભા થયા છે. જો માર્ગ પરના બમ્પર વાહનચાલકો માટે જોખમરૂપ બનતા હોય તો તેની જવાબદારી આખરે કોની?
દરેક માર્ગ અકસ્માત બાદ તંત્ર દ્વારા તપાસ અને કાર્યવાહી કરવાની વાતો કરવામાં આવે છે, પરંતુ જમીન પર સુરક્ષાની વ્યવસ્થામાં કેટલો સુધારો થાય છે તે મોટો પ્રશ્ન છે. શું કોઈનો જીવ ગયા પછી જ તંત્રની આંખો ખૂલશે? આમોદ કોર્ટ નજીકના આ બમ્પરની તાત્કાલિક તપાસ કરવામાં આવે, તેની ઊંચાઈ અને સ્થિતિની ચકાસણી થાય તેમજ જરૂરી ચેતવણીનાં બોર્ડ અને સુરક્ષાનાં પગલાં લેવામાં આવે તેવી માગ ઊઠવી સ્વાભાવિક છે.
સુભાનબીબીના કરુણ મોતથી વિલાયત ગામમાં શોકની લાગણી પ્રસરી છે અને એક પરિવાર પર જાણે આભ તૂટી પડ્યું છે. હવે સવાલ માત્ર એક મહિલાના મોતનો નથી, પરંતુ આવતીકાલે આવા જ જોખમી બમ્પર કોઈ બીજા પરિવારની ખુશીઓ છીનવી ન લે તેનો છે. સંબંધિત તંત્ર આ ઘટનામાંથી બોધપાઠ લઈને તાત્કાલિક પગલાં લેશે કે પછી વધુ એક દુર્ઘટનાની રાહ જોશે?
Author: Yasin Diwan
સમાચાર તેમજ જાહેરાત આપવા માટે સંપર્ક કરો : 9574469023