આમોદ તાલુકાના કોબલા ગામમાં એક અત્યંત ચિંતાજનક અને અજીબોગરીબ ઘટના સામે આવી છે. જ્યાં હડકવા ગ્રસ્ત ભેંસનું મૃત્યુ થતાં તેના દૂધનું સેવન કરનારા સ્થાનિક ગ્રાહકોમાં ગભરાટ ફેલાયો હતો. તુરંત જ તબીબી સલાહ મુજબ, ૩૨ જેટલા ગ્રામજનોએ સામુહિક આરોગ્ય કેન્દ્ર ખાતે હડકવા વિરોધી વેક્સિન લેવા માટે દોટ મૂકી હતી. પ્રાપ્ત માહિતી અનુસાર કોબલા ગામે રહેતા જયેન્દ્રસિંહ પ્રવિણસિંહ રાજની એક ભેંસને ભૂતકાળમાં કોઈ હડકવા ગ્રસ્ત કૂતરાએ કરડ્યું હતું, જેની જાણ તે સમયે પરિવારને નહોતી. લાંબા સમયગાળા બાદ અચાનક ભેંસમાં હડકવાના લક્ષણો દેખાતા ભેંસ માલિક સહિત સમગ્ર ગામમાં ચિંતા પ્રસરી ગઈ હતી. પરિવાર અને ગામલોકોની ચિંતા ત્યારે વધી જ્યારે ભેંસને લક્ષણો જણાતા પહેલાં જ તે વેતરમાં આવી હતી અને તેણે એક બચ્ચાને જન્મ આપ્યો હતો. આ સમય દરમિયાન, ભેંસનું દૂધ સ્થાનિક ગ્રાહકોને વેચવામાં આવ્યું હતું, એટલું જ નહીં પણ ગામલોકો અને અન્ય લોકોએ પણ આ દૂધમાંથી બનાવેલી બરીનું સેવન કર્યું હતું.
લક્ષણો દેખાયાના ત્રણ દિવસ બાદ ભેંસનું મૃત્યુ થયું હતું. પશુ ચિકિત્સકે તપાસ બાદ પુષ્ટિ કરી કે ભેંસનું મૃત્યુ હડકવાને કારણે થયું છે. આ સમાચાર મળતાં જ ભેંસનું દૂધ પીધેલા અને બરી ખાધેલા તમામ સ્થાનિક ગ્રાહકોમાં ગંભીર ચિંતાની લાગણી પ્રસરી હતી. ભેંસના માલિક જયેન્દ્રસિંહ રાજને ગંભીરતા સમજાતા, તેમણે તાત્કાલિક તેમના પરિવાર સાથે આમોદ સામુહિક આરોગ્ય કેન્દ્ર ખાતે પહોંચીને હડકવા વિરોધી વેક્સિન મુકાવી હતી. ત્યાર બાદ તેમણે તેમના દૂધના તમામ ગ્રાહકો અને બરી ખાધેલા લોકોને આ ભયજનક કિસ્સાની જાણ કરી. ગ્રાહકોએ આ માહિતી મળતાં જ ગભરાહટમાં તબીબી સલાહ લેવા માટે આરોગ્ય કેન્દ્ર તરફ દોટ લગાવી હતી. સામુહિક આરોગ્ય કેન્દ્રના તબીબ ડૉ. માનસીએ આ બાબતે પુષ્ટિ કરતાં જણાવ્યું હતું કે, કોબલા ગામના જે લોકોએ આ ભેંસનું દૂધ પીધું હતું, તેમને સાવચેતીના ભાગરૂપે વેક્સિન આપવામાં આવી છે. ગત સાંજ સુધીમાં ગામના ૩૨ લોકોએ હડકવા વિરોધી વેક્સિન મુકાવી દીધી હતી અને તબીબી સૂત્રોના જણાવ્યા અનુસાર, હજી પણ અન્ય લોકો વેક્સિન લેવા માટે આવવાના છે. ભેંસ માલિક જયેન્દ્રસિંહ રાજે આ ઘટના અંગે દુઃખ વ્યક્ત કરતાં જણાવ્યું હતું કે જ્યારે કૂતરાએ કરડ્યું ત્યારે તેમને જાણ નહોતી, અને લક્ષણો દેખાયાના ત્રણ દિવસમાં જ ભેંસ મૃત્યુ પામી હતી. આમોદ આરોગ્ય તંત્રની સમયસરની કાર્યવાહીને કારણે વધુ જોખમ અટકાવવામાં આવ્યું છે અને હાલ પરિસ્થિતિ નિયંત્રણ હેઠળ છે.
યાસીન દિવાન, આમોદ
Author: Naeem Diwan
Owner Of Geogujaratnews.com