વાગરા: ગંધાર ગામે ધર્મમય માહોલ, બીલીઆઈ-મુગલાઇ માતાજીના પટાંગણમાં ૭ દિવસીય શ્રીમદ ભાગવત કથાનો ભવ્ય પ્રારંભ

વાગરા તાલુકાના ગંધાર ગામ ખાતે ધાર્મિક ઉત્સાહ સાથે સાત દિવસીય શ્રીમદ ભાગવત કથાનો શુભારંભ કરવામાં આવ્યો છે. ગામમાં આવેલા શ્રી બીલીઆઈ માતાજી અને શ્રી મુગલાઇ માતાજીના મંદિરના પટાંગણમાં તારીખ ૯ થી ૧૫ નવેમ્બર, ૨૦૨૫ દરમિયાન કથાનું આયોજન કરવામાં આવ્યું છે, જેમાં મોટી સંખ્યામાં ધર્મપ્રેમી જનતા ઉમટી રહી છે. કથાના શુભારંભ પૂર્વે સત્યનારાયણ ભગવાનની કથાનું આયોજન કરવામાં આવ્યું હતું. ત્યારબાદ પરંપરાગત રીતે ભવ્ય પોથીયાત્રાનું આયોજન કરવામાં આવ્યું હતું, જે ગંધાર ગામના મુખ્ય માર્ગો પર ફરી વળી હતી. આ પોથીયાત્રામાં મોટી સંખ્યામાં નગરજનો જોડાયા હતા અને સમગ્ર ગામ ધર્મમય વાતાવરણમાં રંગાઈ ગયું હતું. ત્યારબાદ મહાનુભવોના હસ્તે દીપપ્રાગટ્ય કરીને કથાનો વિધિવત પ્રારંભ કરવામાં આવ્યો હતો. આ સાત દિવસ દરમિયાન કથાકાર શાસ્ત્રી વિનોદ ભટ્ટ તેમની અમૃતમય વાણીમાં ભાવિકોને શ્રીમદ ભાગવત કથાનું રસપાન કરાવશે.કથાની સાથે સાથે ધર્મભીના વાતાવરણને વધુ પ્રબળ બનાવવા માટે આયોજકો દ્વારા વિવિધ ધાર્મિક કાર્યક્રમોનું પણ આયોજન કરવામાં આવ્યું છે, જેમાં અખંડ હવન, રાસ-ગરબા અને જાગરણનો સમાવેશ થાય છે. આ પાવન પ્રસંગનો મોટી સંખ્યામાં ધર્મપ્રેમી જનતા લ્હાવો લે તે માટે સમસ્ત ભરૂચ જિલ્લા આહિર સમાજ તથા ભરવાડ સમાજ દ્વારા સૌને હાર્દિક આમંત્રણ પાઠવવામાં આવ્યું છે. કથાના પ્રારંભ પ્રસંગે કથાકાર વિનોદ ભટ્ટ, ભરૂચ સનાતન ધર્મ પરિવારના ગાદીપતિ સોમદાસ બાપુ સહિત સમસ્ત આહિર સમાજ અને ભરવાડ સમાજના આગેવાનો, સભ્યો તેમજ મોટી સંખ્યામાં નગરજનો ઉપસ્થિત રહીને ધન્યતા અનુભવી હતી.