આમોદ નગરપાલિકા આખરે લાંબી ધ્યાન મંત્રની સમાધિમાંથી બહાર આવી હોય તેવું દેખાઈ રહ્યું છે. મીડિયામાં આવેલા અનેક એહવાલો અને નગરજનોના ગળાફાડ રોષ બાદ વર્ષોથી શહેરના જાહેર રસ્તાઓ પર ત્રાસ આપતા રખડતા પશુઓને પાંજરે પૂરવાની કામગીરી શરૂ કરવામાં આવી છે. પરંતુ આ કામગીરી શરૂ થતાની સાથે જ નગરજનોમાં સંતોષને બદલે કટાક્ષ અને શંકાઓનો માહોલ છવાયો છે. નગરજનો સવાલ ઉઠાવી રહ્યા છે કે, શું આ કામગીરી કાયમી ઉકેલ લાવશે કે પછી માત્ર એક દિવસની નોટબંધી જેવી દેખાવ પૂરતી કાર્યવાહી છે? જાગૃત નાગરિકોના મતે અત્યાર સુધી જે પશુઓ પકડાયા છે. તેમાં મોટાભાગે પશુપાલકોએ પોતે જ પકડી લાવી આપેલા પશુઓ છે! પરિણામે 90% રખડતા પશુઓ હજી પણ શહેરના રસ્તાઓ પર રાજાશાહી ઠાઠથી ફરતા દેખાય છે. નગરજનો કટાક્ષમાં કહી રહ્યા છે કે, પશુઓ માટે તો આમોદ આખું શહેર જ ઓપન જીમ છે, નગરપાલિકા જ ભમરામાં છે!
આમોદ શહેરમાં પશુઓનો જમાવડો એટલો ભયાવહ છે કે, રસ્તાઓ ક્યાં છે અને ગૌશાળા ક્યાં છે તેનો ફરક સમજાવો મુશ્કેલ છે. રખડતા પશુઓના કારણે નગરમાં અકસ્માતોની વણજાર લાગી છે. નાના વિદ્યાર્થીઓ હોય કે વૃદ્ધો, સૌએ જીવ જોખમમાં મૂકી રસ્તાઓ પાર કરવા પડે છે. નગરજનોનો સ્પષ્ટ આરોપ છે કે અત્યાર સુધી નગરપાલિકાએ આંખ આડા કાન કર્યા. પરંતુ જ્યારે સોશિયલ મીડિયામાં સત્ય ખુલ્લું પડ્યું અને જાહેર દબાણ વધ્યું ત્યારે તાત્કાલિક પગલાંનું નાટક શરૂ થયું હોવાની ચર્ચા નગરમાં જોરશોરથી ચાલી રહી છે. જ્યારે પાલિકાના સેનેટરી ઇન્સ્પેક્ટરે મીડિયા સમક્ષ તમામ પશુઓને પાંજરાપોળ મોકલવામાં આવશે અને આગળ પણ આ પ્રકારની કાર્યાવહી કરવામાં આવશે. તેવું નિવેદન આપ્યું હતું. પણ નગરજનોની નજરે આ નિવેદન હવે માત્ર શાબ્દિક શણગાર જ લાગે છે. નગરપાલિકા ખરેખર સક્રિયતા દાખવશે કે પછી આ કાર્યવાહી માત્ર દેખાવ પૂરતી સાબિત થશે? તે એક મોટો પ્રશ્ન છે. આમોદના જાગૃત નગરજનો હવે ચશ્મા પહેરીને તંત્રની દરેક હરકત પર ચાંપતી નજર રાખી રહ્યા છે.
યાસીન દિવાન, આમોદ
Author: Naeem Diwan
Owner Of Geogujaratnews.com