વાગરા: ફેઇથ કેલ્વેરી સેકન્ડરી સ્કૂલનો 20મો વાર્ષિક ઉત્સવ ઉજવાયો, વિદ્યાર્થી પ્રતિભાનું ભવ્ય પ્રદર્શન..

વાગરા ખાતે આવેલી પ્રતિષ્ઠિત ફેઇથ કેલ્વેરી સેકન્ડરી સ્કૂલ દ્વારા તેમના શિક્ષણ જગતની દ્વિ-દશાબ્દી ઉજવતો 20મો વાર્ષિક ઉત્સવ અત્યંત ઉત્સાહ અને ભવ્યતા સાથે સંપન્ન થયો હતો. પ્લે ગ્રુપથી ધોરણ 10 સુધીના એકમાત્ર અંગ્રેજી માધ્યમની આ સંસ્થાએ તેના વિદ્યાર્થીઓના કૌશલ્ય અને આંતરિક પ્રતિભાને પ્રદર્શિત કરવા માટે આ પ્લેટફોર્મનું આયોજન કર્યું હતું. આ દિવ્ય સમારોહમાં 1200થી વધુ લોકોએ હાજરી આપીને યુવા પ્રતિભાઓના બહુમુખી પ્રદર્શનને ઉષ્માભેર વધાવી લીધું હતું. કાર્યક્રમનો પ્રારંભ મંગલકારી દીપ પ્રાગટ્ય અને આકાશમાં ત્રિરંગી બલૂન મુક્ત કરીને કરવામાં આવ્યો હતો, જે દેશભક્તિ અને એકતાની ભાવનાને દૃઢ કરતું પ્રતીક હતું. કાર્યક્રમના મુખ્ય મહેમાનો તરીકે ડોકટર ટી.એમ. ઓંકર અને આશા ઓંકર (ચેરમેન-ફેઇથ કેલ્વેરી એજ્યુકેશન ટ્રસ્ટ) ઉપસ્થિત રહ્યા હતા. સાથે જ, સત્યમસિંહ ગોહિલ, મહેશ રાઠોડ, બી.કે. ચૈતાલી બહેન (બ્રહ્માકુમારી સંસ્થા તરફથી) સહિત ઇમરાન ભટ્ટીએ વિશેષ મહેમાનો તરીકે હાજરી આપી શોભા વધારી હતી.વિદ્યાર્થીઓએ રજૂ કરેલી કૃતિઓ દ્વારા વિવિધ સામાજિક વિષયો પર પ્રકાશ પાડવામાં આવ્યો હતો. તેમની થીમ્સમાં સકારાત્મક સામાજિક સંદેશાઓ જેવા કે મિત્રતાનું મહત્વ, મોબાઇલનો મર્યાદિત ઉપયોગ, વડીલો પ્રત્યે આદર, પ્રેરણા, ગુરુ-શિષ્યના પવિત્ર સંબંધો, અને એકતામાં વિવિધતાનો સમાવેશ થતો હતો. સ્વાગત નૃત્ય, પરંપરાગત ગરબા, તેમજ હોરર, કોમેડી અને મનોરંજન આધારિત નાટકો દ્વારા દર્શકોને મંત્રમુગ્ધ કર્યા હતા. આ યાદગાર ઉત્સવના સફળ આયોજન પાછળ સહયોગી વાલીઓ, શાળાના બહુપ્રતિભાશાળી વિદ્યાર્થીઓ, સમસ્ત શિક્ષકગણ અને પ્રિન્સિપાલ ફાલ્ગુણી મેડમનો મહત્વપૂર્ણ સહયોગ રહ્યો હતો. સમગ્ર આયોજન શાળાના નિર્દેશિકા ડૉ. હીનાના સક્ષમ અને પ્રેરણાદાયી માર્ગદર્શન હેઠળ પાર પડ્યું હતું. શાળા પરિવારે અંતમાં તમામ આમંત્રિત મહેમાનો, વાલીગણ અને ઉપસ્થિત સમુદાયનો આભાર વ્યક્ત કરીને કાર્યક્રમનું સમાપન કર્યું હતું.