ઔદ્યોગિક નગરી અંકલેશ્વરના રેલવે યાર્ડ વિસ્તારમાં આજે સવારના સમયે એ સમયે અફરાતફરીનો માહોલ સર્જાયો જ્યારે એક ગુડ્સ ટ્રેનના ડબ્બા પાટા પરથી ઉતરી ગયા હોવાના સમાચાર વાયુવેગે ફેલાયા હતા. ઘટનાની ગંભીરતા જોતા રેલવેના ઉચ્ચ અધિકારીઓનો કાફલો અને ઈમરજન્સી સાયરનો સાથે ફાયર ફાઈટરો ઘટનાસ્થળે ધસી ગયા હતા. જોકે, પાછળથી જાણવા મળ્યું હતું કે આ કોઈ વાસ્તવિક દુર્ઘટના નહોતી, પરંતુ રેલવે સુરક્ષા દળ અને વહીવટી તંત્ર દ્વારા આયોજિત એક પૂર્વનિર્ધારિત મોકડ્રિલ હતી. રેલવે વિભાગ દ્વારા આયોજિત આ મોકડ્રિલનો મુખ્ય હેતુ રેલવે અકસ્માત જેવી કટોકટીની સ્થિતિમાં વિવિધ વિભાગો વચ્ચેના સંકલનને ચકાસવાનો હતો. જ્યારે માલગાડીના ડબ્બા પાટા પરથી ઉતરે ત્યારે તેને ફરીથી પાટા પર ચઢાવવાની પ્રક્રિયા, તે દરમિયાન જો આગ લાગે તો તેના પર કાબૂ મેળવવો અને જાનમાલનું નુકસાન ઘટાડવા માટેની વ્યુહરચનાનું અહીં પ્રાયોગિક નિદર્શન કરવામાં આવ્યું હતું.
આ ઓપરેશનમાં માત્ર રેલવેના ટેકનિકલ સ્ટાફ જ નહીં, પરંતુ અંકલેશ્વર અને પાનોલી ઇન્ડસ્ટ્રીયલ એસોસિએશનના ફાયર ફાઈટરો પણ સક્રિયપણે જોડાયા હતા. મોકડ્રિલ દરમિયાન રિમોટ લોકેશન પર લાગેલી આગને બુઝાવવા માટે આધુનિક સાધનોનો ઉપયોગ કરવામાં આવ્યો હતો. ફાયર ફાઈટરોએ અત્યંત ટૂંકા સમયમાં ઘટના સ્થળે પહોંચીને રેસ્ક્યુ ઓપરેશનની પ્રેક્ટિસ કરી હતી, જે દર્શાવે છે કે સ્થાનિક ઉદ્યોગો અને રેલવે વચ્ચેનું સંકલન કેટલું સચોટ છે.
સમગ્ર કવાયત દરમિયાન રેલવેના ઉચ્ચ અધિકારીઓ સ્થળ પર હાજર રહ્યા હતા અને દરેક સેકન્ડનું ઝીણવટભર્યું નિરીક્ષણ કર્યું હતું. અધિકારીઓએ જણાવ્યું હતું કે, આવી મોકડ્રિલથી સ્ટાફની કાર્યક્ષમતા વધે છે અને વાસ્તવિક અકસ્માત સમયે ગભરાટ ફેલાવાને બદલે પ્રોટોકોલ મુજબ ઝડપથી કામ કરવાની તાલીમ મળે છે. કામગીરી પૂર્ણ થયા બાદ ભૂલો અને સુધારાના અવકાશ અંગે પણ ચર્ચા કરવામાં આવી હતી. આ આધુનિક કવાયતને જોવા માટે આસપાસના વિસ્તારના લોકોના ટોળેટોળા ઉમટી પડ્યા હતા, પરંતુ સત્ય જાણવા મળતા સૌએ રેલવેની આ સુરક્ષા સજ્જતાના વખાણ કર્યા હતા.
Author: geogujaratnews
geogujarat2020@gmail.com www.geogujaratnews.com