વાગરા ગ્રામ પંચાયત કચેરી ખાતે 77મા પ્રજાસત્તાક દિવસની ઉજવણી ભવ્ય અને ગૌરવપૂર્ણ માહોલમાં કરવામાં આવી હતી. વહેલી સવારથી જ પંચાયત કચેરીને રાષ્ટ્રધ્વજ અને ત્રિરંગા સજાવટથી શોભાવવામાં આવી હતી, જેના કારણે સમગ્ર પરિસરમાં દેશભક્તિની ભાવના છલકાઈ રહી હતી. કાર્યક્રમની શરૂઆત ગામના સરપંચ ફરજાનાબેન સઇદ મુન્શીના હસ્તે વિધિવત ધ્વજારોહણ સાથે કરવામાં આવી હતી. ધ્વજારોહણ બાદ ઉપસ્થિત સૌએ એકસાથે રાષ્ટ્રગીતનું ગાન કર્યું હતું, જેમાં વિદ્યાર્થીઓ, પંચાયતના સભ્યો અને ગામના નાગરિકો દેશપ્રેમના ભાવથી જોડાયા હતા. આ પ્રસંગે પ્રજાસત્તાક દિવસના મહત્વ અંગે સંક્ષિપ્ત સંદેશ આપવામાં આવ્યો હતો. અને બંધારણના મૂલ્યો, લોકશાહી તથા નાગરિક ફરજો અંગે જાગૃતિ વ્યક્ત કરવામાં આવી હતી.
કાર્યક્રમ દરમિયાન ગ્રામ પંચાયતના સભ્યો, શાળાના વિદ્યાર્થીઓ તેમજ ગામના અગ્રણી નાગરિકોની ઉપસ્થિતિ નોંધપાત્ર રહી હતી. સૌએ એકતાનો સંદેશ આપતા દેશના વિકાસમાં સહભાગી બનવાની પ્રતિજ્ઞા લીધી હતી. સમગ્ર સમારંભ શાંતિ, સૌહાર્દ અને રાષ્ટ્રગૌરવની ભાવનાને ઉજાગર કરતો રહ્યો હતો.
Author: Naeem Diwan
Owner Of Geogujaratnews.com