દક્ષિણ અમેરિકાના દેશ બોલિવિયા માં એક હૃદયદ્રાવક વિમાન દુર્ઘટનાએ સમગ્ર દેશને શોકમાં મૂકી દીધો છે. રાજધાની લા પાઝ નજીક બનેલી આ ઘટના અંગે મળતી પ્રાથમિક માહિતી મુજબ એક વિમાન ટેકઓફ બાદ થોડા જ સમયમાં ટેકનિકલ ખામીના કારણે નિયંત્રણ ગુમાવી બેઠું હતું. વિમાન હવામાં અસ્થિર બનતા પાયલોટે તાત્કાલિક કાબૂ મેળવવાનો પ્રયાસ કર્યો હતો, પરંતુ થોડી જ ક્ષણોમાં વિમાન શહેર નજીકના વ્યસ્ત હાઇવે પર જઈને ધરાશાયી થયું હતું. અકસ્માત બાદ વિસ્તારમાં ભય અને અફરાતફરીનો માહોલ સર્જાયો હતો. હાઇવે પર દોડતી અનેક વાહનોને પણ નુકસાન પહોંચ્યું હોવાનું જાણવા મળ્યું છે. આ દુર્ઘટનામાં ઓછામાં ઓછા 15 લોકોના મોત નીપજ્યા હોવાનું સત્તાવાર સૂત્રોએ જણાવ્યું છે, જ્યારે અનેક લોકો ગંભીર રીતે ઘાયલ થયા છે. ઘાયલોને તાત્કાલિક નજીકની હોસ્પિટલોમાં ખસેડવામાં આવ્યા હતા, જ્યાં કેટલાકની હાલત ગંભીર હોવાનું જણાવાઈ રહ્યું છે.
રેસ્ક્યુ ટીમો અને સ્થાનિક પ્રશાસન ઘટના સ્થળે પહોંચી રાહત અને બચાવ કામગીરી શરૂ કરી દીધી હતી. આગ લાગવાની શક્યતા વચ્ચે ફાયર બ્રિગેડ દ્વારા આગ પર કાબૂ મેળવવાનો પ્રયાસ કરવામાં આવ્યો હતો. દુર્ઘટનાના કારણોની તપાસ શરૂ કરી દેવામાં આવી છે અને પ્રાથમિક રીતે ટેકનિકલ ખામી અથવા એન્જિન ફેલ થવાનું કારણ હોઈ શકે તેવી આશંકા વ્યક્ત કરવામાં આવી રહી છે. સરકાર દ્વારા મૃતકોના પરિવારજનોને સાંત્વના પાઠવવામાં આવી છે અને સમગ્ર ઘટના અંગે ઉચ્ચસ્તરીય તપાસના આદેશ આપવામાં આવ્યા છે.
Author: Naeem Diwan
Owner Of Geogujaratnews.com