પવિત્ર રમઝાન માસ દરમિયાન મુસ્લિમ બિરાદરો આકરી ઈબાદત કરી રહ્યા છે, ત્યારે અમોદ શહેરના પુરસા રોડ નવિ નગરી વિસ્તારમાં રહેતા એક ૭ વર્ષના બાળકે અપ્રતિમ શ્રદ્ધાનું ઉદાહરણ પૂરું પાડ્યું છે. નવિ નગરી વિસ્તારમાં રહેતા ઈરફાન દિવાનના પુત્ર વારિસ ઈરફાન દિવાને માત્ર ૭ વર્ષની નાની વયે પોતાના જીવનનો પ્રથમ રોજો અત્યંત ઉત્સાહભેર પૂર્ણ કર્યો હતો. ગરમી અને લાંબા સમયના ઉપવાસ હોવા છતાં આ નાનકડા બાળકની ભક્તિમાં સહેજ પણ ઓટ જોવા મળી નહોતી. વહેલી સવારે સહેરીથી શરૂ કરીને સાંજે ઈફ્તાર સુધી વારિસે મક્કમ મનોબળ સાથે ભૂખ અને તરસ સહન કરી અલ્લાહની ઈબાદત કરી હતી. તેની આ અનોખી આસ્થા જોઈ પરિવારજનો અને સ્થાનિકોમાં પણ આનંદ અને ગર્વની લાગણી જોવા મળી હતી.
રોજો પૂર્ણ કર્યા બાદ સાંજે ઈફ્તારના સમયે આ નાનકડા વારિસે ખુદાની બારગાહમાં હાથ ફેલાવી અત્યંત માસૂમિયત સાથે વિશેષ દુઆઓ માંગી હતી. તેણે પરિવારની સુખ-શાંતિ, દેશમાં અમન-ચમન જળવાઈ રહે અને સૌના સ્વાસ્થ્ય માટે કરેલી આ આજીજીએ સૌ કોઈના દિલ જીતી લીધા હતા. એક તરફ ભૂખ-તરસનો સંયમ અને બીજી તરફ હાથ જોડીને માંગેલી આ પવિત્ર દુઆ, આ દ્રશ્ય ખરેખર હૃદયસ્પર્શી હતું. તેની આ નાનકડી ઉંમરની ગંભીર આસ્થા જોઈને વડીલોએ પણ તેને ઉમળકાભેર આશીર્વાદ આપ્યા હતા.આ અવસરે દિવાન પરિવારમાં ખુશીનો માહોલ છવાયો હતો. બાળકના પ્રથમ રોજાને યાદગાર બનાવવા માટે પરિવારજનો દ્વારા તેને ફૂલહાર પહેરાવીને ભવ્ય સ્વાગત કરવામાં આવ્યું હતું. વડીલોએ તેને દુઆઓ આપી પ્રોત્સાહિત કર્યો હતો અને મીઠાઈ ખવડાવી તેની હિંમતને બિરદાવી હતી. આ નાનકડા વારિસની ભક્તિ આજે સમગ્ર પંથકમાં ચર્ચાનું કેન્દ્ર બની છે.
Author: Yasin Diwan
સમાચાર તેમજ જાહેરાત આપવા માટે સંપર્ક કરો : 9574469023