વાગરા: જુંજેરા વિદ્યાલયની સ્માર્ટ પહેલ, હવે ડિજિટલ નહીં, પણ વિઝ્યુઅલ ચાર્ટ દ્વારા ટ્રેક થશે વિદ્યાર્થીઓની હાજરી, ગેરહાજરી ઘટશે, ઉત્સાહ વધશે..

શિક્ષણ જગતમાં પરિવર્તન હંમેશા મોટા ફેરફારોથી નથી આવતું, પરંતુ ક્યારેક એક નાનકડો વિચાર પણ મોટું પરિણામ લાવી શકે છે. આવો જ એક પ્રેરણાદાયી અને નવતર પ્રયોગ વાગરાની ‘જુંજેરા વિદ્યાલય દ્વારા હાથ ધરવામાં આવ્યો છે. હાલમાં જ્યારે વાર્ષિક પરીક્ષાનો સમયગાળો અત્યંત નજીક છે, ત્યારે વિદ્યાર્થીઓમાં નિયમિતતા વધારવા અને શિક્ષણ પ્રત્યે રુચિ જગાડવા માટે ધોરણ-8 માં મારી હાજરી, મારો ઉત્સાહ નામનો એક વિશેષ હાજરી ચાર્ટ પ્રયોગ શરૂ કરવામાં આવ્યો છે. શાળાના ટ્રસ્ટી, આચાર્ય અને શિક્ષક મિત્રોના સહિયારા પુરુષાર્થથી શરૂ થયેલો આ પ્રોજેક્ટ માત્ર હાજરી પૂરવા પૂરતો મર્યાદિત નથી, પરંતુ તે વિદ્યાર્થીઓની શિસ્ત અને જવાબદારીનું પ્રતિબિંબ છે. સામાન્ય રીતે શાળાઓમાં બાળકોની ગેરહાજરીને કારણે તેમની શીખવાની ગતિ ધીમી પડતી હોય છે. આ સમસ્યાના ઉકેલ રૂપે તૈયાર કરાયેલ વિઝ્યુઅલ સ્માર્ટ ચાર્ટ દ્વારા હવે ગેરહાજરીનું ટ્રેકિંગ અત્યંત સરળ બન્યું છે. મહિનાના અંતે રજિસ્ટરના પાના ઉથલાવ્યા વગર પણ કયો વિદ્યાર્થી કેટલો ગેરહાજર છે તે આ ચાર્ટની મદદથી ત્વરિત જાણી શકાય છે. આ પ્રયોગની સૌથી મોટી વિશેષતા એ છે કે તેને વાલીઓ સાથે જોડવામાં આવ્યો છે. આ હાજરી ચાર્ટના ફોટા રોજેરોજ વર્ગના વોટ્સએપ ગ્રુપમાં મૂકવામાં આવે છે, જેથી વાલીઓ સીધું જ જોઈ શકે છે કે તેમનું બાળક શાળામાં કેટલું નિયમિત છે. આનાથી બાળક પોતે પણ પોતાની હાજરી પ્રત્યે જાગૃત બને છે અને તેનામાં દરરોજ શાળાએ આવવાનો એક નવો ઉત્સાહ અને સ્પર્ધાત્મક ભાવના જાગે છે. ચાર્ટમાં નોંધાતો દરેક ‘P’ (Present) એ બાળકના ઉજ્જવળ ભવિષ્યની પ્રથમ સીડી સમાન છે. આ પદ્ધતિ અત્યંત ઓછી ખર્ચાળ હોવાની સાથે સાથે ખૂબ જ અસરકારક સાબિત થઈ રહી છે. હાલમાં આની શરૂઆત ધોરણ-8 થી કરવામાં આવી છે, પરંતુ તેની સફળતા જોતા ટૂંક સમયમાં શાળાના દરેક વર્ગખંડોમાં આ ચાર્ટ લગાવવામાં આવશે. રાજ્યની દરેક સરકારી અને ખાનગી શાળાઓ માટે જુંજેરા વિદ્યાલયનો આ પ્રયોગ એક આદર્શ ઉદાહરણ પૂરું પાડે છે. શિક્ષણ જગતના આવા નાનકડા વિચારને દરેક વર્ગખંડ સુધી પહોંચાડવો એ આજના સમયની માંગ છે, જેથી દરેક બાળક શિક્ષણના મુખ્ય પ્રવાહમાં નિયમિત રીતે જોડાયેલું રહે.