જંબુસર-આમોદ પંથકના તુવેર પકવતા ખેડૂતો માટે રાહતના સમાચાર, ૧૮ માર્ચથી ટેકાના ભાવે ખરીદીનો પ્રારંભ, ધારાસભ્ય ડી.કે. સ્વામીના પ્રયાસો સફળ

ભરૂચ જિલ્લાના જંબુસર અને આમોદ તાલુકાના ખેડૂતો માટે ખેતીવાડી ક્ષેત્રે એક ઉત્સાહવર્ધક સમાચાર સામે આવ્યા છે. સ્થાનિક ધારાસભ્ય ડી.કે. સ્વામીની સક્રિય રજૂઆતો અને પ્રયત્નોને પગલે રાજ્ય સરકારે આ વિસ્તારમાં તુવેરના પાકની ટેકાના ભાવે ખરીદી શરૂ કરવાની મંજૂરી આપી દીધી છે. આ નિર્ણયથી મધ્યમ અને નાના ખેડૂતોને તેમના પરસેવાના પાકનો વાજબી ભાવ મળશે, જે તેમની આર્થિક સ્થિતિ સુધારવામાં માઈલસ્ટોન સાબિત થશે. આગામી ૧૮ માર્ચ ૨૦૨૬થી વિધિવત રીતે આ ખરીદી પ્રક્રિયાનો પ્રારંભ થવા જઈ રહ્યો છે, જેમાં ખેડૂતો પાસેથી પ્રતિ ક્વિન્ટલ ૮૦૦૦ના ભાવે તુવેર સ્વીકારવામાં આવશે. આ ખરીદી પ્રક્રિયાનું સંચાલન ‘ધી નાહિએર વિવિધ કાર્યકારી સેવા સહકારી મંડળી લિ.દ્વારા કરવામાં આવશે, જેને ગુજકોફેડ (ગાંધીનગર), NCCF અને નાફેડ જેવી રાષ્ટ્રીય સંસ્થાઓનો સહયોગ પ્રાપ્ત થયો છે. ખેડૂતોની સુવિધા માટે જંબુસર-ભરૂચ હાઈવે પર રેવા સુગર ફેક્ટરીની બાજુમાં આવેલ પ્લોટ નંબર NA-278 (તા. આમોદ) ખાતે વિશાળ ખરીદ કેન્દ્ર ઉભું કરવામાં આવ્યું છે.આ યોજનાનો લાભ લેવા ઈચ્છતા ખેડૂતોએ જરૂરી દસ્તાવેજો જેવા કે ૭/૧૨ અને ૮-અ ના ઉતારા, બેંક પાસબુક અથવા કેન્સલ ચેક, વાવેતરનો તલાટીનો દાખલો અને આધારકાર્ડ સાથે રજીસ્ટ્રેશન કરાવવું અનિવાર્ય છે. મંડળીના ચેરમેન જયંતભાઈ આઈ. પટેલ અને સેક્રેટરી ચંદુભાઈ પટેલે આ તકનો મહત્તમ લાભ લેવા ખેડૂતોને અનુરોધ કર્યો છે. રજીસ્ટ્રેશન અને વધુ વિગતો માટે મહંમદભાઈનો સંપર્ક કરવા પણ જણાવાયું છે. ધારાસભ્યના આ ભગીરથ પ્રયાસને કારણે પંથકમાં ખુશીની લહેર દોડી ગઈ છે, કારણ કે આ આયોજનથી વચેટિયાઓની ચુંગાલમાંથી મુક્તિ મળશે અને ખેડૂતોના ખાતામાં સીધા નાણાં જમા થશે, જેનાથી સમગ્ર કૃષિ અર્થતંત્રને નવું બળ મળશે.

Author: Yasin Diwan

સમાચાર તેમજ જાહેરાત આપવા માટે સંપર્ક કરો : 9574469023