જાગૃત નાગરિકનો કોલ અને વાગરા પોલીસની ત્વરિત કાર્યવાહી, બેદરકાર કાર ચાલકને બરોબરનો પાઠ ભણાવ્યો: જાહેર માર્ગોને પોતાની જાગીર સમજી બેદરકારીપૂર્વક વાહન પાર્ક કરી ટ્રાફિકજામ સર્જતા તત્વો સામે વાગરા પોલીસે લાલ આંખ કરી છે. વાગરાના વ્યસ્ત ગણાતા ચીમનચોક પાસે પોતાની લક્ઝરી કાર રસ્તાની વચ્ચે ઉભી રાખી અન્ય વાહનચાલકો અને રાહદારીઓ માટે મુશ્કેલી ઉભી કરનાર સુરતના એક શખ્સ વિરુદ્ધ પોલીસે કાયદેસરનો ગુનો નોંધી શિખામણરૂપ કાર્યવાહી કરી છે. ઘટનાની વિગતો મુજબ, ગત ૧૮ માર્ચ ૨૦૨૬ના રોજ સવારે વાગરાના મુખ્ય એવા ચીમનચોક પાસે ટ્રાફિકની ગંભીર સમસ્યા સર્જાઈ હતી. સુરતના મોટા વરાછા વિસ્તારનો રહેવાસી નિલેશ બાબુભાઈ સુતરીયાએ પોતાની ટોયોટા કાર નંબર GJ-05-CH-8873 જાહેર માર્ગ પર ગમે તેમ પાર્ક કરી, બાજુમાં ઉભો રહી તમાશો જોઈ રહ્યો હતો. આ શખ્સની ઘોર બેદરકારીના કારણે અડધો કલાક સુધી ટ્રાફિકના પૈડાં થંભી ગયા હતા અને લોકો ભારે હાલાકીમાં મુકાયા હતા.
સાવધાન! રસ્તા વચ્ચે ગાડી પાર્ક કરી તો ખેર નથી! વાગરા પોલીસ એક્શનમાં: એક જવાબદાર નાગરિકે આ અરાજકતા જોઈ તાત્કાલિક 112 પર કોલ કરી પોલીસને જાણ કરી હતી. ભરૂચ કંટ્રોલ રૂમ દ્વારા મેસેજ મળતા જ વાગરા પોલીસ સ્ટેશનના કોન્સ્ટેબલ મહાવીરસિંહ અભજી સહિતનો કાફલો ઘટનાસ્થળે દોડી ગયો હતો. પોલીસે ત્વરિત પગલાં ભરી રસ્તો ખુલ્લો કરાવ્યો હતો અને ટ્રાફિકના નિયમોનું સરેઆમ ઉલ્લંઘન કરનાર નિલેશ સુતરીયા વિરુદ્ધ સત્તાવાર ફરિયાદ નોંધી તેની અટકાયત કરી હતી.
જાહેર માર્ગ પર અડચણ ઉભી કરવી એ માત્ર બેદરકારી નથી પરંતુ કાયદાનો અનાદર છે. આવા તત્વો સામે પોલીસ કડક હાથે કામ લેશે : વાગરા પોલીસ – હાલમાં આ કેસની વધુ તપાસ હેડ કોન્સ્ટેબલ સુરેશજી ઠાકોર ચલાવી રહ્યા છે. વાગરા પોલીસની આ આક્રમક કાર્યવાહીથી રોડ પર મનસ્વી રીતે વાહનો થોભાવી દેતા લેભાગુ તત્વોમાં ફફડાટ વ્યાપી ગયો છે. પોલીસે સ્પષ્ટ સંકેત આપ્યો છે કે જાહેર જનતાની સુખાકારીમાં ખલેલ પહોંચાડનાર કોઈપણ હોય, તેને છોડવામાં આવશે નહીં.
Author: Naeem Diwan
Owner Of Geogujaratnews.com