આમોદ શહેરના હિન્દૂ સ્મશાનના અટવાયેલા નવીનીકરણ કાર્યને ફરીથી વેગ આપવા માટે આમોદ નગર પાલિકા દ્વારા એક મહત્વપૂર્ણ બેઠકનું આયોજન કરવામાં આવ્યું હતું. શહેરના જાહેર હિત સાથે જોડાયેલા આ પ્રોજેક્ટને લઈને છેલ્લા કેટલાક સમયથી વિવિધ ચર્ચાઓ ચાલી રહી હતી. સ્મશાનમાં ચાલી રહેલી કામગીરી દરમિયાન સર્જાયેલા વિવાદોને પગલે કામકાજ અટકી ગયું હતું, જેના કારણે શહેરજનોમાં પણ ચિંતા જોવા મળી રહી હતી. હવે નવી પરિસ્થિતિમાં પાલિકા તંત્ર દ્વારા આ મુદ્દાને પ્રાથમિકતા આપીને કામગીરી ઝડપથી પૂર્ણ થાય તે દિશામાં પ્રયાસો હાથ ધરાયા છે. મળતી માહિતી અનુસાર, અગાઉ ભાજપ શાસિત નગર પાલિકા બોર્ડના કાર્યકાળ દરમિયાન શહેરના હિન્દૂ સ્મશાનના સર્વાંગી વિકાસ અને આધુનિક સુવિધાઓ ઊભી કરવા માટે અંદાજે એક કરોડ રૂપિયાના ખર્ચે વિકાસ યોજના તૈયાર કરવામાં આવી હતી. ટેન્ડર પ્રક્રિયા પૂર્ણ થયા બાદ કામગીરી માટે એજન્સીની નિમણૂક પણ કરવામાં આવી હતી. જોકે કામ દરમિયાન કેટલીક જૂની સુવિધાઓને દૂર કરવામાં આવતા અને સમાજના સહયોગથી ઊભી કરાયેલી વ્યવસ્થાઓને નુકસાન પહોંચતા સ્થાનિક સ્તરે અસંતોષનો માહોલ સર્જાયો હતો. પરિણામે નવીનીકરણનું કામ અધવચ્ચે અટકી ગયું હતું.
આ સ્થિતિને ધ્યાનમાં રાખી કોંગ્રેસ શાસિત હાલના નગર પાલિકા બોર્ડ દ્વારા શહેર સ્મશાન કમિટી, સ્થાનિક આગેવાનો તેમજ સંબંધિત અધિકારીઓ સાથે ચર્ચા કરી સમગ્ર મામલાનું નિરાકરણ લાવવાનો પ્રયાસ કરવામાં આવ્યો હતો. બેઠકમાં નગર પાલિકાના પ્રમુખ, ઉપપ્રમુખ, કારોબારી સમિતિના ચેરમેન, પાલિકા એન્જિનિયર, કોન્ટ્રાક્ટર પ્રતિનિધિઓ તથા સ્મશાન કમિટીના સભ્યો હાજર રહ્યા હતા. બેઠક દરમિયાન નવીનીકરણ કાર્યના વિવિધ પાસાઓ અંગે વિસ્તૃત ચર્ચા કરવામાં આવી હતી. બેઠકમાં ખાસ કરીને કામગીરીની ગુણવત્તા, મજબૂતી અને લાંબા ગાળે ટકાઉ રહે તેવા મુદ્દાઓ પર ભાર મૂકવામાં આવ્યો હતો. 
કોન્ટ્રાક્ટરને સ્પષ્ટપણે જણાવવામાં આવ્યું હતું કે કામ મંજૂર થયેલા એસ્ટીમેટ અને તકનીકી ધોરણો અનુસાર જ કરવું પડશે. કોઈ પણ પ્રકારની હલકી ગુણવત્તાની સામગ્રી અથવા બેદરકારીભર્યું કામ ચલાવી લેવામાં આવશે નહીં. સાથે જ કામગીરી દરમિયાન શહેરજનોની લાગણીઓ અને ધાર્મિક સંવેદનાઓનું પણ સંપૂર્ણ ધ્યાન રાખવાની સૂચના આપવામાં આવી હતી. નગર પાલિકા દ્વારા એવો પણ વિશ્વાસ વ્યક્ત કરવામાં આવ્યો હતો કે સ્મશાનના નવીનીકરણનું કામ પૂર્ણ થયા બાદ શહેરને વધુ સુવિધાસભર અને વ્યવસ્થિત સ્મશાન મળશે. સમગ્ર કામગીરી દરમિયાન પાલિકાના પદાધિકારીઓ, ટેક્નિકલ ટીમ અને સ્મશાન કમિટીના સભ્યો દ્વારા સતત દેખરેખ રાખવામાં આવશે જેથી વિકાસ કાર્યમાં પારદર્શિતા જળવાઈ રહે અને કોઈ પ્રકારની ફરિયાદને અવકાશ ન રહે. શહેરના લોકો પણ હવે લાંબા સમયથી અટવાયેલા આ પ્રોજેક્ટનું કામ ઝડપથી પૂર્ણ થાય તેવી અપેક્ષા વ્યક્ત કરી રહ્યા છે.
Author: Yasin Diwan
સમાચાર તેમજ જાહેરાત આપવા માટે સંપર્ક કરો : 9574469023