ઔદ્યોગિક સુરક્ષા અને કર્મચારીઓની સુખાકારીને સર્વોચ્ચ પ્રાથમિકતા આપવાના ઉમદા હેતુ સાથે, ગુજરાત આલ્કલીઝ એન્ડ કેમિકલ્સ લિમિટેડ દ્વારા ડેપ્યુટી ડાયરેક્ટર ઓફ ઇન્ડસ્ટ્રીયલ સેફ્ટી એન્ડ હેલ્થ, ભરૂચના કાર્યાલય સાથે સંયુક્ત ઉપક્રમે દાહેજ-1 કોમ્પ્લેક્સ ખાતે રાસાયણિક ઉદ્યોગોમાં અકસ્માત નિવારણ અને ફોલ પ્રોટેક્શન વિષયક એક વિશેષ સેફ્ટી મીટનું સફળ આયોજન કરવામાં આવ્યું હતું. દાહેજ ઇન્ડસ્ટ્રીયલ એસોસિએશન સાથે સંકળાયેલા 80થી વધુ સુરક્ષા પ્રતિનિધિઓ અને ક્ષેત્રના અગ્રણી નિષ્ણાતોની પ્રેરણાદાયી ઉપસ્થિતિ વચ્ચે યોજાયેલા આ કાર્યક્રમની શરૂઆત GACLના કોમ્પ્લેક્સ હેડ રાજેશ પાટીલના સેફ્ટી સંદેશ સાથે થઈ હતી. તેમણે સુરક્ષાને માનવ ગૌરવ પ્રત્યેના આદરનું માપદંડ ગણાવતા ભારપૂર્વક જણાવ્યું હતું કે, ઉદ્યોગોની જવાબદારી માત્ર સંપત્તિ અને ઉત્પાદન પૂરતી સીમિત નથી, પરંતુ કર્મચારીઓ અને સમાજને સુરક્ષિત રાખવાની પણ છે. આ સાથે જ તેમણે ડી.સી. ગામિતના સરાહનીય પ્રયાસોને બિરદાવી કાર્યક્રમ માટે શુભેચ્છા પાઠવતાં ઉમેર્યું હતું કે, આવી બેઠકો નવા પ્રગતિશીલ વિચારોને પ્રોત્સાહન આપીને સુરક્ષાને માત્ર એક પ્રાથમિકતા નહીં પરંતુ આપણી જીવનશૈલી બનાવવાની પ્રતિબદ્ધતાને વધુ દ્રઢ કરે છે.
આ સેફ્ટી મીટ દરમિયાન GACL દ્વારા વર્ષ દરમિયાન સફળતાપૂર્વક અમલમાં મૂકાયેલી ચાર શ્રેષ્ઠ સેફ્ટી પહેલોની પ્રભાવશાળી રજૂઆત કરવામાં આવી હતી. ત્યારબાદ, ડી.સી. ગામિત દ્વારા મેન્યુઅલ મોડ દ્વારા કેમિકલ હેન્ડલિંગમાં પ્રોસેસ સેફ્ટી વિષય પર ગહન માર્ગદર્શન પૂરું પાડવામાં આવ્યું હતું, જેને ઉપસ્થિત તમામ પ્રતિનિધિઓએ મુક્તકંઠે સરાહ્યું હતું. આ ઉપરાંત, ભાઈલાલ અમીન હોસ્પિટલના જાણીતા પ્લાસ્ટિક સર્જન ડૉ. હેતાંશુ પારેખે રાસાયણિક ઉદ્યોગોમાં થતી બર્ન ઇજાઓના કિસ્સાઓમાં તાત્કાલિક સારવાર અને રાખવાની થતી તકેદારીઓ અંગે અત્યંત મહત્વપૂર્ણ તબીબી માહિતી શેર કરી હતી, જ્યારે KARAM ની તકનીકી ટીમ દ્વારા ઊંચાઈ પર કામ કરતી વખતે જરૂરી એવા વિવિધ ફોલ પ્રોટેક્શન સાધનોના યોગ્ય ઉપયોગ અને સુરક્ષા સંબંધિત ઉપાયો અંગે જીવંત પ્રાયોગિક માર્ગદર્શન આપવામાં આવ્યું હતું. સમગ્ર રાસાયણિક ઉદ્યોગ જગતમાં સુરક્ષિત કાર્યપદ્ધતિને પ્રોત્સાહન આપવા અને અકસ્માત મુક્ત વાતાવરણનું નિર્માણ કરવાના ઉદ્દેશ્ય સાથે યોજાયેલી આ સેફ્ટી મીટ જાગૃતિ ફેલાવવામાં અત્યંત પ્રશંસનીય અને સીમાચિહ્નરૂપ સાબિત થઈ છે.
Author: Naeem Diwan
Owner Of Geogujaratnews.com