જંબુસર પોલીસ મથકે SP અક્ષયરાજ મકવાણાનું વાર્ષિક નિરીક્ષણ: કાયદો-વ્યવસ્થાની સમીક્ષા સાથે ‘જનકેન્દ્રિત પોલીસિંગ’ પર અપાયો વિશેષ ભાર

ભરૂચ જિલ્લા પોલીસ વડા (SP) અક્ષયરાજ મકવાણા દ્વારા બુધવારના રોજ જંબુસર પોલીસ સ્ટેશનની વાર્ષિક ઇન્સ્પેક્શન મુલાકાત લેવામાં આવી હતી. તેમના આગમન વેળાએ પોલીસ વિભાગ દ્વારા પરંપરાગત શિસ્ત સાથે ‘ગાર્ડ ઓફ ઓનર’ આપી તેમનું ઉષ્માભર્યું સ્વાગત કરાયું હતું. આ વાર્ષિક નિરીક્ષણનો મુખ્ય ઉદ્દેશ્ય પોલીસ મથકની વહીવટી કાર્યક્ષમતા ચકાસવાનો, પેન્ડિંગ કેસોની ગતિ આપવાનો અને સ્થાનિક સ્તરે સુરક્ષા વ્યવસ્થાને વધુ સંગીન બનાવવાનો હતો.વિસ્તૃત ઇન્સ્પેક્શન દરમિયાન જિલ્લા પોલીસ અધિક્ષકે પોલીસ સ્ટેશનના ગુના રજીસ્ટરો, તપાસ હેઠળના કેસોની પ્રગતિ, મુદ્દામાલની સુરક્ષા, શસ્ત્રાગાર (Arms Depot) તેમજ લોકઅપની સ્થિતિનું બારીકાઈથી નિરીક્ષણ કર્યું હતું. કચેરીના વહીવટી રેકોર્ડની જાળવણી અને પોલીસ સ્ટેશન પરિસરની સ્વચ્છતા અંગે સંતોષ વ્યક્ત કરવાની સાથે તેમણે જરૂરી વહીવટી સુધારાઓ માટે સ્થળ પર જ રચનાત્મક સૂચનો આપ્યા હતા.ઇન્સ્પેક્શનના અંતે યોજાયેલી ઉચ્ચ સ્તરીય સમીક્ષા બેઠકમાં SP અક્ષયરાજ મકવાણાએ હાજર અધિકારીઓ અને કર્મચારીઓને કાયદો અને વ્યવસ્થાની સ્થિતિ વધુ મજબૂત કરવા તાકીદ કરી હતી. તેમણે ખાસ કરીને ‘પ્રજાલક્ષી અને સંવેદનશીલ પોલીસિંગ’ (People-centric Policing) પર ભાર મૂકતા જણાવ્યું કે, પોલીસ મથકે આવતા સામાન્ય ફરિયાદીઓ સાથે સૌજન્યપૂર્ણ વર્તન રાખવું અને ગુનાઓનો ઝડપી તેમજ પારદર્શી ઉકેલ લાવવો એ પ્રાથમિકતા હોવી જોઈએ. જનતામાં ખાખી પ્રત્યેનો વિશ્વાસ વધુ દ્રઢ બને તે રીતે નિષ્ઠાપૂર્વક ફરજ બજાવવા તેમણે સમગ્ર સ્ટાફને પ્રોત્સાહિત કર્યો હતો.