રાજકોટ જીલ્લાના ધોરાજીમાં રોનક સ્કૂલ ખાતે ઈદે મિલાદ નિમિત્તે નાત શરીફ સ્પર્ધા અને તેજસ્વી તારલાઓના સન્માન સમારોહનું આયોજન

ધોરાજી શહેરની રોનક સ્કૂલ ખાતે પવિત્ર ઈદે મિલાદ નિમિત્તે નાત શરીફ સ્પર્ધા તેમજ તેજસ્વી તારલાઓના સન્માન સમારોહનું ભવ્ય આયોજન કરવામાં આવ્યું હતું. કાર્યક્રમમાં શાળાના વિદ્યાર્થીઓએ ઉત્સાહપૂર્વક ભાગ લીધો હતો અને નાત શરીફની સુંદર રજૂઆતો દ્વારા ઉપસ્થિત સૌના દિલ જીતી લીધા હતા. ઈદે મિલાદના પવિત્ર પ્રસંગને અનુરૂપ સમગ્ર કાર્યક્રમ ધાર્મિક માહોલ, શિક્ષણ અને સંસ્કારના સુંદર સમન્વય સાથે યોજાયો હતો.આ કાર્યક્રમ દરમિયાન રોનક સ્કૂલમાં અભ્યાસ કરતા વિદ્યાર્થીઓ-વિદ્યાર્થિનીઓ પૈકી શૈક્ષણિક અભ્યાસની સાથે ઉચ્ચ શિક્ષણ તરફ આગળ વધતા તેમજ ઇસ્લામિક તાલીમ અને ધાર્મિક શિક્ષણમાં પણ ઉત્કૃષ્ટ પ્રગતિ કરનાર તેજસ્વી તારલાઓને વિશેષ સન્માન આપવામાં આવ્યું હતું. મહેનત, પ્રતિભા અને શિક્ષણ ક્ષેત્રે સિદ્ધિ મેળવનાર વિદ્યાર્થીઓને શિલ્ડ અને મોમેન્ટો આપી પ્રોત્સાહિત કરવામાં આવ્યા હતા. વિદ્યાર્થીઓના સન્માનથી સમગ્ર કાર્યક્રમમાં આનંદ અને ઉત્સાહનો માહોલ છવાયો હતો.આ પ્રસંગે ધોરાજીના નામાંકિત શિક્ષણવિદ અમીન સાહેબ ગોડિલ, નિષ્ણાંત તબીબ ડો. બશીર સાહેબ ગરાણા, ડો. હારૂન સાહેબ ગરાણા, ડો અકીમ ચામડિયા સાહેબ ડો મોસીન સાહેબ ગરાણા એમ.એમ. સ્કૂલના પ્રિન્સિપાલ રીટાબેન ધામી અગ્રણી બિલ્ડર મોહમદ ભાઈ ગરાણા સહિતના મહાનુભાવો વિશેષ ઉપસ્થિત રહ્યા હતા. મહાનુભાવોના હસ્તે તેજસ્વી વિદ્યાર્થીઓને શિલ્ડ તથા મોમેન્ટો આપી સન્માનિત કરવામાં આવ્યા હતા. ઉપસ્થિત મહાનુભાવોએ વિદ્યાર્થીઓને અભિનંદન પાઠવી ભવિષ્યમાં પણ શિક્ષણ ક્ષેત્રે સતત પ્રગતિ કરવા પ્રેરણા આપી હતી.કાર્યક્રમ દરમિયાન રોનક સ્કૂલના આચાર્ય એહમદ સાહેબે પ્રસંગિક પ્રવચન કરતા ઈદે મિલાદના મહત્વ અંગે વિદ્યાર્થીઓને સમજણ આપી હતી. તેમણે જણાવ્યું હતું કે ઈદે મિલાદનો પવિત્ર પ્રસંગ માત્ર ઉજવણી પૂરતો સીમિત ન રાખતા પયગંબર હઝરત મહંમદ મુસ્તફા સલ્લલ્લાહુ અલૈહિ વસલ્લમના જીવનમાંથી શિક્ષણ, સદાચાર, પ્રેમ, ભાઈચારો, માનવતા અને શાંતિની પ્રેરણા લેવી જોઈએ. આચાર્ય એહમદ સાહેબે હિંગોરા વાલીઓને પણ શિક્ષણ બાબતે વધુ જાગૃત થવા ખાસ હાકલ કરી હતી. તેમણે જણાવ્યું હતું કે આજના આધુનિક અને ટેકનિકલ યુગમાં બાળકોને ગુણવત્તાયુક્ત શિક્ષણ આપવું સમયની સૌથી મોટી જરૂરિયાત છે. માત્ર શાળામાં ભણાવવાથી નહીં પરંતુ વાલીઓએ પણ બાળકોના અભ્યાસમાં રસ લેવો, તેમની પ્રગતિ અંગે સતત જાણકારી મેળવવી અને તેમને ઉચ્ચ શિક્ષણ માટે પ્રોત્સાહિત કરવા જરૂરી છે.તેમણે વધુમાં જણાવ્યું હતું કે આજના સમયમાં ટેકનોલોજી અને આધુનિક શિક્ષણનો વ્યાપ સતત વધી રહ્યો છે. વિદ્યાર્થીઓએ સમયની સાથે તાલ મિલાવીને આધુનિક શિક્ષણ, ટેકનિકલ શિક્ષણ અને ઉચ્ચ અભ્યાસ તરફ આગળ વધવું જોઈએ. સાથે સાથે પોતાની સંસ્કૃતિ, સંસ્કાર અને ધાર્મિક શિક્ષણ સાથે જોડાયેલા રહેવું પણ એટલું જ મહત્વનું છે. શિક્ષણ અને સંસ્કારનું સંયોજન જ વિદ્યાર્થીઓને જીવનમાં સાચી સફળતા અપાવી શકે છે.રોનક સ્કૂલ દ્વારા ઈદે મિલાદ નિમિત્તે આયોજિત નાત શરીફ સ્પર્ધા અને તેજસ્વી તારલાઓના સન્માન સમારોહને કારણે વિદ્યાર્થીઓમાં પણ ભારે ઉત્સાહ જોવા મળ્યો હતો. નાત શરીફ સ્પર્ધામાં વિદ્યાર્થીઓએ સુંદર અને ભાવસભર રજૂઆતો કરી ઈદે મિલાદની ખુશીને વધુ ઉજળી બનાવી હતી. કાર્યક્રમમાં ઉપસ્થિત મહાનુભાવો, વાલીઓ, શિક્ષકો અને વિદ્યાર્થીઓએ બાળકોની પ્રતિભાને બિરદાવી હતી.આ પ્રસંગે ઉપસ્થિત મહાનુભાવોએ રોનક સ્કૂલના સંચાલન અને શિક્ષકમંડળ દ્વારા શિક્ષણ સાથે ધાર્મિક અને નૈતિક સંસ્કારોને પ્રોત્સાહન આપવા બદલ અભિનંદન પાઠવ્યા હતા. સાથે જ તેજસ્વી વિદ્યાર્થીઓને ભવિષ્યમાં ઉચ્ચ શિક્ષણ મેળવી સમાજ અને દેશનું નામ રોશન કરવા શુભેચ્છાઓ પાઠવવામાં આવી હતી.આ સમગ્ર કાર્યક્રમ દરમિયાન શિક્ષણ, સંસ્કાર, ધાર્મિક જ્ઞાન અને વિદ્યાર્થીઓના સર્વાંગી વિકાસને કેન્દ્રસ્થાને રાખવામાં આવ્યો હતો. રોનક સ્કૂલ ખાતે યોજાયેલ ઈદે મિલાદનો આ કાર્યક્રમ વિદ્યાર્થીઓ માટે પ્રેરણાદાયી બની રહ્યો હતો અને વાલીઓમાં પણ પોતાના બાળકોને વધુમાં વધુ શિક્ષણ અપાવવાની જાગૃતિ ફેલાવતો રહ્યો હતો.આ કાર્યકર્મ ને સફળ બનાવવા માટે રોનક સ્કૂલના પ્રાથમિક અને માધ્યમિક શાળા ના સ્ટાફ એ જહેમત ઉઠાવી હતી