પહાજ હત્યાકાંડ: આમોદના બજારમાં વાગરા પોલીસનું મોટું સર્ચ ઓપરેશન; જે દુકાનેથી છરો ખરીદ્યો તે સ્થળ હત્યારાએ પોતે ઓળખી બતાવતાં તસવીર સાફ

વાગરા તાલુકાના ચકચારી પહાજ ગામે ૨૭ વર્ષીય વસીમ ઇકબાલ દિવાનની નિર્દયતાપૂર્વક કરાયેલી હત્યાના કેસમાં વાગરા પોલીસે તપાસનો આક્રમક ધમધમાટ આગળ ધપાવ્યો છે. કસ્ટડી રિમાન્ડ હેઠળના આરોપીને સાથે રાખીને વાગરા પોલીસની વિશેષ ટીમે આજે આમોદ શહેરમાં ધામા નાખ્યા હતા. કડક પૂછપરછ દરમિયાન મળેલી મહત્વની કડીઓના આધારે પોલીસે હાથ ધરેલા આ વિશેષ ઓપરેશનમાં, આરોપીએ પોતે જ હત્યામાં ઉપયોગમાં લીધેલો ઘાતક છરો આમોદની જે દુકાનેથી ખરીદ્યો હતો તે સ્થળ પોલીસ સમક્ષ પ્રત્યક્ષ રીતે ઓળખી બતાવ્યું હતું.ઘટનાસ્થળે હત્યાનું સફળ રિકન્સ્ટ્રક્શન કરાવવા ઉપરાંત ગુનામાં વપરાયેલી બુલેટ બાઈક તેમજ આરોપીના કપડાં કબ્જે કર્યા બાદ, હવે હથિયાર ખરીદીના મૂળ સ્થાન સુધી પહોંચીને વાગરા પોલીસે સમગ્ર ગુનાઈત સાજિશ અને પૂર્વ-આયોજિત કાવતરાના સબળ પુરાવા એકત્ર કરવાની દિશામાં મજબૂત પકડ બનાવી છે.આમોદના બજારમાં સંબંધિત વેપારી અને સ્થાનિકોની પૂછપરછ હાથ ધરીને છરો કઈ તારીખે, કેટલા રૂપિયામાં, કોની પાસેથી અને કયા સંજોગોમાં ખરીદવામાં આવ્યો હતો તે તમામ પાસાંઓ પર કાયદાકીય તપાસ તેજ કરવામાં આવી છે. વાગરા પોલીસની આ સમયસરની અને આક્રમક કાર્યવાહીથી આગામી દિવસોમાં આ બહુચર્ચિત કેસમાં વધુ કેટલાક ચોંકાવનારા પર્દાફાશ થવાની પૂરેપૂરી શક્યતાઓ સેવાઈ રહી છે.