ભરૂચ જિલ્લામાં વર્ષોથી પોલીસ માટે માથાનો દુખાવો બનેલો અને મોસ્ટ વોન્ટેડ ટોપ-10 યાદીમાં સામેલ લૂંટ વિથ મર્ડરના ગુનાનો આરોપી આખરે કાયદાના સકંજામાં આવી ગયો છે. 13 વર્ષથી પોલીસને ચકમો આપી ફરાર રહેતો આરોપી સંતોષ પ્રસાદ બુધન પ્રસાદને ભરૂચ જિલ્લા પેરોલ ફર્લો સ્કવોડની ટીમે બિહારના ગોપાલગંજ જિલ્લાના અંતરિયાળ વિસ્તારમાંથી દબોચી લીધો છે. ભરૂચ જિલ્લા પોલીસ વડા અક્ષયરાજ મકવાણાની કડક સૂચના અને પેરોલ ફર્લો સ્કવોડના પી.એસ.આઈ. આર.એસ. ચાવડાના માર્ગદર્શન હેઠળ લિસ્ટેડ આરોપીઓને પકડવા માટે વિશેષ પેટ્રોલિંગ અને હ્યુમન ઇન્ટેલિજન્સના આધારે ઓપરેશન હાથ ધરાયું હતું. બાતમી મળતાં જ ટીમે બિહારના લાંમીચોર-જગતોલી વિસ્તારમાં વોચ ગોઠવી અને ફિલ્મી ઢબે દરોડો પાડી આરોપીને ઝડપી લીધો હતો.
વાગરા પોલીસ સ્ટેશનમાં નોંધાયેલા લૂંટ વિથ મર્ડરના ગંભીર ગુનામાં છેલ્લા 13 વર્ષથી ફરાર આરોપી સામે ઇનામ પણ જાહેર કરવામાં આવ્યું હતું. અનેક વખત પોલીસને હાથતાળી આપનાર આરોપી આખરે પેરોલ ફર્લો સ્કવોડની સચોટ બાતમી અને સતત દેખરેખના કારણે બચી શક્યો નહીં. આરોપીની ધરપકડ બાદ તેને કાયદેસરની કાર્યવાહી માટે ભરૂચ લાવવામાં આવ્યો છે. હવે પોલીસ તેની વધુ પૂછપરછ કરી ગુનાની અન્ય કડીઓ, સંડોવાયેલા શખ્સો અને ફરારી દરમિયાન મળેલી મદદ અંગે ઊંડાણપૂર્વક તપાસ ચલાવી રહી છે. 13 વર્ષ પછી પણ કાયદાનો હાથ લાંબો સાબિત થયો છે. ભરૂચ જિલ્લા પોલીસના આ ઓપરેશને ફરી એકવાર સ્પષ્ટ સંદેશ આપ્યો છે કે ગંભીર ગુનાઓમાં ફરાર આરોપીઓ ગમે ત્યાં છુપાયા હોય, કાયદાના સકંજામાંથી લાંબા સમય સુધી બચી શકતા નથી.
આ સમગ્ર સફળ ઓપરેશનમાં વાગરા પોલીસ સ્ટેશનના પી.આઈ. એસ.એન. ગોહિલના માર્ગદર્શન હેઠળ તેમજ ભરૂચ પેરોલ ફર્લો સ્કવોડના પી.એસ.આઈ. આર.એસ. ચાવડાની આગેવાનીમાં ટીમે મહત્વપૂર્ણ ભૂમિકા ભજવી હતી. ટીમમાં એ.એસ.આઈ. મગનલાલ પરમાર, હેડ કોન્સ્ટેબલ હિતેશકુમાર વસાવા, હેડ કોન્સ્ટેબલ રાકેશભાઈ કંડોલિયા, વાગરા પોલીસ મથકના હેડ કોન્સ્ટેબલ ભોપાભાઈ ભૂંડીયા તથા પોલીસ કોન્સ્ટેબલ અનિલભાઈ કટારા સહિતના જવાનોએ સંયુક્ત રીતે હ્યુમન ઇન્ટેલિજન્સ અને ટેક્નિકલ સર્વેલન્સના આધારે બિહાર સુધી પહોંચીને 13 વર્ષથી ફરાર મોસ્ટ વોન્ટેડ આરોપીને ઝડપી પાડી ભરૂચ જિલ્લા પોલીસની વધુ એક નોંધપાત્ર સફળ કામગીરીને અંજામ આપ્યો હતો.
Author: Naeem Diwan
Owner Of Geogujaratnews.com