ભરૂચમાં નર્મદા મૈયા બ્રિજ પર ભયંકર અકસ્માત! ટ્રેક્ટર-મોપેડની ટક્કરથી બ્રિજ પર મચી અફરાતફરી

ભરૂચના નર્મદા મૈયા બ્રિજ પર આજે મોપેડ અને ટ્રેક્ટર વચ્ચે સર્જાયેલા ગંભીર અકસ્માતે થોડા સમય માટે અફરાતફરીનો માહોલ સર્જી દીધો હતો. વ્યસ્ત બ્રિજ પર થયેલી જોરદાર ટક્કરમાં મોપેડ ચાલક ગંભીર રીતે ઈજાગ્રસ્ત થતા સ્થાનિકોમાં ચિંતા ફેલાઈ ગઈ હતી. અકસ્માત બાદ આસપાસના લોકો તાત્કાલિક ઘટનાસ્થળે દોડી આવ્યા અને ઈજાગ્રસ્તને મદદ પહોંચાડવાનો પ્રયાસ કર્યો. ઘટનાની જાણ થતાં જ 108 એમ્બ્યુલન્સ સ્થળ પર પહોંચી ઈજાગ્રસ્તને પ્રાથમિક સારવાર આપીને વધુ સારવાર માટે હોસ્પિટલ ખસેડ્યો હતો.અકસ્માતના પગલે નર્મદા મૈયા બ્રિજ પર થોડા સમય માટે વાહનોની અવરજવર પ્રભાવિત થઈ હતી અને મોટી સંખ્યામાં લોકો ઘટનાસ્થળે એકત્ર થયા હતા. સદ્નસીબે આ ગંભીર અકસ્માતમાં કોઈ જાનહાની નોંધાઈ નથી, પરંતુ મોપેડ ચાલકને ગંભીર ઈજાઓ પહોંચી હોવાનું સામે આવ્યું છે. આ ઘટના ફરી એકવાર ભરૂચના વ્યસ્ત માર્ગો પર બેદરકારીભર્યા વાહનચાલન અને ટ્રાફિક શિસ્ત અંગે ગંભીર સવાલો ઉભા કરે છે. બ્રિજ જેવા સંવેદનશીલ માર્ગ પર ભારે વાહનો અને નાના વાહનોની અવરજવર દરમિયાન વધુ સાવચેતી રાખવામાં આવે અને ટ્રાફિક નિયમોનું કડક પાલન કરાવવામાં આવે તેવી માંગ સ્થાનિકોમાં ઉઠી રહી છે.