બનાસકાંઠા જિલ્લાના ડીસા ST ડેપોમાં નાણાકીય ગેરરીતિ અને મશીનોની ચોરીના આક્ષેપોને પગલે ગુજરાત રાજ્ય માર્ગ વાહન વ્યવહાર નિગમ (ST વિભાગ)માં ખળભળાટ મચી ગયો છે. ડેપોમાં 3.67 લાખની ગેરરીતિના મામલે કંડક્ટર આર.આર. રબારી સહિત ચાર કર્મચારીઓ સામે સસ્પેન્શનના આદેશ જારી કરવામાં આવ્યા છે. આ કાર્યવાહીથી ST વિભાગના વહીવટી તંત્રમાં જવાબદારી અને નાણાકીય વ્યવહારોની પારદર્શિતા અંગે ગંભીર સવાલો ઊભા થયા છે. મળતી માહિતી મુજબ, ડીસા ડેપોમાં 12 EBTM મશીનોની ચોરી અને બુકિંગ મશીનના માધ્યમથી આશરે 30 હજારની ઉચાપતના આક્ષેપો સામે આવ્યા છે. આ મામલો માત્ર સાધનો ગુમ થવા કે નાણાકીય હિસાબમાં ખામી પૂરતો સીમિત નથી, પરંતુ વિભાગની આંતરિક દેખરેખ અને જવાબદારીની વ્યવસ્થા સામે પણ પ્રશ્નો ઊભા કરે છે. જાહેર પરિવહન સેવા સાથે જોડાયેલા વિભાગમાં જો આવી ગેરરીતિઓના આક્ષેપો સામે આવે, તો તેની ગંભીરતાથી તપાસ થવી અનિવાર્ય છે. આ કેસમાં કંડક્ટર આર.આર. રબારી સહિત ચાર કર્મચારીઓને સસ્પેન્ડ કરવામાં આવ્યા છે. સૌથી મહત્ત્વની બાબત એ છે કે, વિભાગીય નિયામક એમ.બી. રાવલ સામે પણ સસ્પેન્શનની કાર્યવાહી કરવામાં આવી હોવાનું જણાવાયું છે.
ઉચ્ચ સ્તરના અધિકારી સામે લેવાયેલા આ પગલાંથી સમગ્ર મામલો વધુ ગંભીર બન્યો છે. જોકે, સસ્પેન્શન એ વિભાગીય કાર્યવાહી છે અને સંબંધિત કર્મચારીઓની જવાબદારી અંગે અંતિમ નિષ્કર્ષ તપાસ તથા પુરાવાના આધારે જ નક્કી થશે. જાહેર નાણાં અને સરકારી સાધનોની જવાબદારી કોની? આ ઘટનાએ એવો સવાલ ઊભો કર્યો છે કે ડેપોમાં મશીનોની ચોરી અને નાણાકીય ગેરરીતિના આક્ષેપો સામે આવ્યા ત્યાં સુધી દેખરેખ રાખતી વ્યવસ્થા શું કરી રહી હતી? જો તપાસમાં ગેરરીતિ સાબિત થાય, તો જવાબદાર વ્યક્તિઓ સામે નિયમ મુજબ કડક કાર્યવાહી થવી જોઈએ. સાથે જ, સમગ્ર ઘટનાની નિષ્પક્ષ તપાસ કરીને નાણાકીય નુકસાનની વસૂલાત અને આવી ઘટનાઓનું પુનરાવર્તન અટકાવવા અસરકારક પગલાં લેવાં પણ જરૂરી છે. સરકારી પરિવહન વ્યવસ્થા જનતાના વિશ્વાસ અને જાહેર નાણાંના આધારે ચાલે છે. તેથી ડીસા ST ડેપેના આ મામલે માત્ર સસ્પેન્શન સુધી કાર્યવાહી મર્યાદિત ન રહે, પરંતુ તપાસમાં જે હકીકતો સામે આવે તેના આધારે જવાબદારી નક્કી થાય તે મહત્ત્વનું છે. હવે તપાસમાં 3.67 લાખની ગેરરીતિના આક્ષેપો, 12 EBTM મશીનોની ચોરી અને બુકિંગ મશીન મારફતે થયેલી કથિત ઉચાપત અંગે શું વિગતો બહાર આવે છે તેના પર સૌની નજર રહેશે.
Author: Naeem Diwan
Owner Of Geogujaratnews.com