આમોદ:ભરૂચ જિલ્લાના આમોદ તાલુકાના ઇખર ગામે ૯૨ વર્ષીય વયોવૃદ્ધ પિતા મહમ્મદ યુસુફ ઉર્ફે ઇસપ પટેલની નિર્મમ હત્યા કરી તેમનો મૃતદેહ સળગાવી દેવાના ચકચારી અને કાળજુ કંપાવી દે તેવા કેસમાં ભરૂચ પોલીસને મોટી સફળતા સાંપડી છે. માનવતા અને પવિત્ર પારિવારિક સંબંધોને લજવતા આ બનાવમાં ભરૂચ લોકલ ક્રાઇમ બ્રાન્ચ (LCB) અને આમોદ પોલીસે સંયુક્ત કામગીરી કરી મૃતકના પોતાના જ સગા પુત્ર મુસ્તાક ઉર્ફે અલી મહંમદ યુસુફ પટેલની ધરપકડ કરી લીધી છે. ધરપકડ બાદ પોલીસે આ ઘાતકી ગુનાની કડીઓ જોડવા તથા કાયદાકીય પુરાવા મજબૂત કરવા માટે આરોપીને સાથે રાખીને ઘટનાસ્થળે ક્રાઇમ રિકન્સ્ટ્રક્શન હાથ ધર્યું હતું.
પ્રાપ્ત માહિતી અનુસાર, ઇખર ગામની સીમમાં ઇખરથી મેસરાદ જવાના નહેર (કેનાલ) માર્ગ પર આવેલા ઝાડી-ઝાંકરામાંથી ૯૨ વર્ષીય મહમ્મદ યુસુફનો અર્ધસળગેલી અને ભીષણ હાલતમાં મૃતદેહ મળી આવતાં સમગ્ર પંથકમાં ભારે અરેરાટી સાથે ચકચાર મચી ગઈ હતી. શરૂઆતમાં અત્યંત રહસ્યમય લાગતી આ ઘટના અંગે જાણ થતાં જ ભરૂચ જિલ્લા પોલીસ વડાના માર્ગદર્શન હેઠળ એલસીબી, આમોદ પોલીસ, ડોગ સ્ક્વોડ, હ્યુમન સોર્સ અને ટેકનિકલ સર્વેલન્સની ટીમો તાત્કાલિક એક્શનમાં આવી હતી.
તપાસ દરમિયાન પોલીસના હ્યુમન નેટવર્ક અને બાતમીદારો પાસેથી મહત્વની વિગતો મળી હતી કે, મૃતકના પુત્ર મુસ્તાક ઉર્ફે અલીની ગતિવિધિઓ શંકાસ્પદ છે. જેના આધારે પોલીસે શંકાસ્પદ પુત્રને તાત્કાલિક ઝડપી પાડી ભરૂચ એલસીબી કચેરી ખાતે ઊંડાણપૂર્વક પૂછપરછ હાથ ધરી હતી.
પોલીસની આકરી પૂછપરછ સામે આરોપી પુત્ર ભાંગી પડ્યો હતો અને તેણે પિતાની હત્યા કરી હોવાની ચોંકાવનારી કબૂલાત કરી હતી. પૂછપરછમાં ગુના પાછળનું કથિત કારણ આપતાં આરોપીએ જણાવ્યું હતું કે, તેના વયોવૃદ્ધ પિતા ગામમાં લોકો પાસે પૈસા માગતા હતા અને જાહેર કરતા હતા કે તેમના દીકરાઓ તેમની યોગ્ય સારસંભાળ રાખતા નથી કે તેમની સારવાર કરાવતા નથી. પિતાની આ વર્તણૂક અને લોકો પાસે પૈસા માગવાની ટેવના કારણે ગામમાં પરિવારની ભારે બદનામી થતી હોવાની લાગણી પુત્ર અનુભવતો હતો. આ બાબતે ઘરમાં અવારનવાર પિતા સાથે જીભાજોડી અને ઝઘડા પણ થતા હતા. આખરે પિતાના વર્તનથી કંટાળી ગયેલા પુત્રે છેલ્લા બે દિવસથી જ પિતાનું કાસળ કાઢી નાખવાનું ક્રૂર ષડયંત્ર રચ્યું હતું.
ઘટનાના દિવસે વયોવૃદ્ધ પિતા નમાજ પતાવીને ઘરે પરત ફર્યા ત્યારે પુત્ર મુસ્તાકે “બહારનું કામ છે, મદદમાં આવો” તેમ કહીને તેમને વિશ્વાસમાં લીધા હતા. ત્યારબાદ તે પિતાને ઇખર-મેસરાદ રોડ પર કેનાલ પાસેના ઝાડી-ઝાંકરામાં લઈ ગયો હતો. ત્યાં આવેશ અને ગુસ્સામાં આવીને પુત્રે પિતાને આડેધડ માર માર્યો હતો તેમજ પથ્થરના ઘા છાતીના ભાગે મારીને જમીન પર ઢાળી દીધા હતા. પિતા બેભાન/મૃતપ્રાય થઈ જતાં પુત્રે પિતાના ખિસ્સામાં રાખેલા રોકડા રૂપિયા પણ કાઢી લીધા હતા. ત્યારબાદ અગાઉથી જ પ્લાસ્ટિકની કેનમાં સાથે લાવેલું પેટ્રોલ પિતાના શરીર પર છાંટી તેમને સળગાવી દીધા હતા. ગુનો આચર્યા બાદ શાતિર પુત્રે ઘરે આવીને કોઈને શંકા ન જાય તે માટે પિતા ક્યાંક ગુમ થઈ ગયા હોવાનું નાટક કરી વાત ફેલાવી હતી.
હત્યાનો ભેદ ઉકેલાયા બાદ આમોદ પોલીસ અને એફ.એસ.એલ. (FSL)ની ટીમે આરોપીને સાથે રાખીને બનાવ વાળા સ્થળે પંચક્યાસ સાથે ઘટનાનું રિકન્સ્ટ્રક્શન કરાવ્યું હતું. આ કાર્યવાહી દરમિયાન આરોપીએ ઘટનાને કઈ રીતે અંજામ આપ્યો, ઘટનાક્રમ શું હતો, કયા સ્થળે મારામારી કરી, ક્યાંથી પેટ્રોલ છાંટીને મૃતદેહ સળગાવ્યો અને કઈ પ્રવૃત્તિ થઈ હતી તે તમામ પાસાંનું બારીકાઈથી પરીક્ષણ કરવામાં આવ્યું હતું. 
વયોવૃદ્ધ પિતાની નિર્મમ હત્યાના આ બનાવથી પારિવારિક સંબંધો અને માનવતા સામે ગંભીર સવાલો ઊભા થયા છે. હાલ પોલીસે આરોપી વિરુદ્ધ ગુનો નોંધી આગળની કાયદાકીય કારાવાસ અને પુરાવા એકત્ર કરવાની કાર્યવાહી હાથ ધરી છે. કોર્ટમાં તમામ આરોપો સાબિત થાય અને પોલીસ તપાસ પૂર્ણ થાય તે દિશામાં આગળની તપાસ નિર્ણાયક બની રહેશે.
Author: Yasin Diwan
સમાચાર તેમજ જાહેરાત આપવા માટે સંપર્ક કરો : 9574469023